Gibalikan na sa Docast Construction ang P24 milyunes nga road concreting project nga ilang temporaryong gibiyaan niadtong ikaduhang semana sa Septiyembre ning tuiga sa dalan Monares, Barangay Kalunasan, dakbayan sa Sugbo.
Ang pagbalik sa contractor nahibaw-an atol sa regular session sa Cebu City Council dihang gipahibawo nilang Konsehal Dondon Hontiveros, Jerry Guardo ug Pastor Alcover Jr. ang maayong balita alang sa libuan ka mga residente sa Kalunasan, nga adunay 17,000 ka mga botante ug kapin o kulang 40,000 ka mga lumolupyo.
Si Barangay Kapitan Nunilon Monares Jr. nalipay sa maong kalambuan sanglit human gibiyaan sa Docast ang proyekto kapin usa na ka buwan ang nakalabay, nakahatag kini og kahasol sa mga residente ug motorista labi na kon moulan.
Matod ni Monares nga dako og ikatabang para sa ilang barangay ang proyekto sanglit kini ang magsumpay sa sementadong dalan gikan sa Barangay Capitol Site paingon sa Girl Scout of the Philippines (GSP) diin gatusan ka mga motorsiklo ang moagi matag adlaw labi na kay nagsige na ang klase sa kabataan.
NGANONG MIBALIK
Si Guardo, chairman sa committee on infrastructure sa City Council, nagkanayon nga gipatawag sa buhatan ni Atty. Jerone Castillo, chief special assistant on special program sa Office of the Mayor, ang contractor, nga ilang gitambungan kauban si Alcover.
Gihulagway ni Guardo nga usa ka “win-win solution” ang gihimo tali sa Siyudad ug sa contractor, diin gipadayag sa konsehal nga tiwason sa Docast Construction ang proyekto sa dili pa ang Disyembre 25 ug atimanon sa City Government ang progress billing statement sa contractor aron sila mabayran sa ilang pagtrabaho.
Ang Docast nihunong sa pagtrabaho sa proyekto niadtong ikaduhang semana sa Septiyembre gumikan sa alegasyon nga wala sila mabayri sa ilang pagtrabaho bisan kon 40% ang ilang completion rate.
Ang Docast maoy usa sa contractors panahon ni kanhi mayor Edgardo Labella sa mga infra project ug sila sab ang nakakuha sa kontrata paghakot sa basura gikan sa transfer station paingon sa landfill.
Si Mayor Michael Rama, niadtong Hulyo, niawhag sa National Bureau of Investigation (NBI) sa pag-imbestigar sa kontrata sa nga gisudlan sa Docast Construction, JJ&J Construction and General Supply gumikan sa audit observation report sa Commission on Audit (CA) nga nag-ingong dili sila kwalipikado nga motanyag sa maong klase sa serbisyo.
