Lalaking wala mag-helmet nga nagmaneho sa motorsiklo gipahunong sa checkpoint sa Parian Police Station sa dalan Sikatuna, Barangay Parian, dakbayan sa Sugbo, alas 11:00 sa gabii sa Miyerkules, Oktubre 19, 2022, ug nasakpan na hinuon nga maghatod unta siya og gidiling drugas.
Ang suspek nga si Rosalito Dinglasa Cañete, 30, taga Sityo Cabangcalan, Barangay Bulacao, dakbayan sa Talisay nihata og dagan apan nahawiran sa kapulisan hinungdan nga napusasan.
Sa pagrekisa sa kapulisan, nakita ang dala niya nga gibanabana nga 200 gramos sa gituohang shabu nga mobalor og P1.3 milyunes subay sa standard drug price (SDP).
Si Police Major Efren Diaz Jr., hepe sa Parian Police Station, nagkanayon nga usa ka oras matag gabii mopahigayon sila og checkpoint sa atubangan sa ilang estasyon sa dalan Sikatuna.
Matod ni Diaz, dihang gipangayoan og lisensiya si Cañete, gituklod sa suspek ang usa sa mga pulis sa checkpoint ug nisuway pagdagan apan nahawiran kini sa kauban nga mga pulis.
Si Cañete gimanduan nga huboon ang belt bag niining dala ug didto nadiskobrehan nga duna siyay dala nga mga pinutos nga bulto sa gidudahang shabu.
Didto na gibasahan si Cañete sa iyang katungod ug gipusasan.
Dugang ni Diaz nga sa ilang pagpangutana kang Cañete, niingon kini nga igo lang unta siya maghatud sa drugas sa siyudad ug human niini, plano unta niyang mamaye sa iyang uyab.
Ang suspek nibutyag nga nahukman niini sa paghatud sa gabii kay mingaw na ang mga dalan.
Kaso nga kalapasan sa paghupot og ilegal nga drugas ang iyang atubangon nga kalapasan sa Akta Republika 9165 o Comprehensive Dangerous Drugs Act of 2002.
