Bomb threats na sab sa Qimonda

Ang Cebu City Hall of Justice sa Qimonda Building sa North Reclamation Area sa dakbayan sa Sugbo nakadawat na usab og sunodsunod nga bomb threats kagahapon sa hapon, Oktubre, 20, 2022.

Si Police Major Erańo Regidor, hepe sa Mabolo Police Station sa Cebu City Police Office (CCPO), nagkanayon nga si Police Staff Sergeant Niko Gil Dagalea nga nadestino sa Qimonda building maoy nipahibawo sa estasyon kalabot sa maong impormasyon.

Ang mga sakop sa Explosives Ordnance Disposal (EOD) sa kapulisan g K-9 Unit gipadala dayon sa lugar aron pagsusi sa dapit.

Matud ni Regidor, nga subay sa testimoniya ni Ma. Gerlie Capuyan, court interpreter sa Municipal Trial Court in Cities (MTCC) Branch 16, ala 1:01 sa hapon usa ka text message ang nadawat gikan sa numero 09202185758 nga niingon nga “Bomb detonates today @ 4th floor and 3rd Floor vehicle GXT-2951 last to explode in the vicinity...”

Tungod sa nadawat nga taho, dali kini niyang gitawagan apan dili na makontak ang maong numero, busa dali niini nga gipahibawo si Judge Marlon Moneva.

Samtang sa pagka ala 1:13 sa hapon ug ala 1:15, laing clerk of court sa MTCC ang nakadawat sa susamang hulga gikan sa numero 09336902544 ug 09397853498.

Tungod sa maong alarma, ang mga sakop sa EOD nisubay sulod ug gawas sa maong edipesyo apan sa alas 2:45 negatibo ang tibuok dapit.

Si Regidor nipahibalo dayon nga false alarm ang maong bomb threats.

Pipila na ka higayon nga dunay pagpanghulga sa pagbomba sa maong edipesyo apan sa paglingkod ni Regidor isip hepe sa Mabolo Police Station, mao pa lang ni ang unang higayon nga dunay nadawat nga bomb threats ug nagpadayon ang ilang imbestigasyon.

Samtang ang unang bomb threats sa maong dapit wala mailhi kon kinsa ang naghimo.