Gabii sa Kabilin karon ipahigayon

Human sa duha ka tuig nga walay linawas nga Gabii sa Kabilin tungod sa pandemiya sa Covid-19, mobalik kini karon, Oktubre 21, 2022, alas 6:00 sa gabii ngadto sa alas 12:00 sa tungang gabii uban sa pag-apil sa kapin sa 20 ka museums ug heritage sites sa mga dakbayan sa Sugbo, Mandaue, ug Talisay.

Sa dakbayan sa Sugbo, ang Archdiocesan Museum of Cebu, Archdiocesan Shrine of San Nicolas de Tolentino Parish, Archdiocesan Shrine of the Most Sacred Heart of Jesus, Basilica Minore del Santo Niño Museum, Casa Gorordo Museum, Cebu City Museum, Fort San Pedro , Fo Guang Shan Chu Un Temple, Museo Parian sa Sugbo – 1730 Jesuit House, Museo Sugbo, Palm Grass Cebu The Heritage Hotel, RAFI – The Kabilin Center, St. Theresa’s College – Sr. Ma Delia Coronel Folklife Museum, Sugbu Chinese Heritage Museum , University of the Philippines Cebu, University of San Carlos Museum ug University of Southern Philippines Foundation Rizaliana Museum.

Sa Mandaue, ang Mandaue City Presidencia. Sa Talisay, ang Cebu Archdiocesan Shrine of Jesus Nazareno Heritage of Faith Museum ug Museo de Talisay uban sa dugang sites sa dakbayan.

Ang tiket nagkantidad og P200 matag usa. Apan ang mga senior citizen ug mga estudyante mahimong makapalit og mga tiket sa tag P80 matag usa kon mapakita ang valid identification ( ID) card sa bisan unsang ticketing site.

Sa usa ka tiket, mahimo nang mosulod sa bisan asang sites ug dunay libre nga buses lakip sa tartanilya apan sa limitadong rota.

Ang mga bata nga nag-edad og siyete anyos paubos makadawat og libreng admission ug rides. Apan kinahanglan nga ubanan sila sa mga hamtong. (BBT, TPT)