BISAN sa mga kontrobersiya, mga Dabawenyos pabiling misalig ug mirespeto sa Police Regional Office-Davao Region (PRO-Davao), sumala sa bag-ohay pang resulta sa surbey.
"We take pride dito sa result. In fact, cum laude kami pagdating sa rating ng trust, respect and safety," mapasigarbuhon nga pahayag ni Major Atty. Eudisan Gultiano, tigpamaba sa PRO Davao, atol sa AFP-PNP Press Conference niadtong Oktubre 19, 2022.
Matud ni Gultiano nga ang resulta sa surbey nagpakita nga ang PRO-Davao nakadawat og 91 porsiyento alang sa trust index, 92 porsiyento alang sa safety index ug 90 porsiyento alang sa respect index.
Apan gisulti ni Gultiano nga nakakuha sila og gamay nga "rating" gikan sa nagpangedaron og 18-30 anyos kon hisgutan ang trust rating.
"Kasi itong mga 18 to 30 years old ito yong usually na nadadala sa some of the issues, more on mataas natin mga above age ng 18 to 30 years old, nararamdaman talaga nila yong safety and 'yong trust," pahayag ni Gultiano.
Iyang gitin-aw nga mga respondente mga Dabawenyos ug dili mga pulis nga nagserbisyo.
"Very scientific ang survey at research ng Minda at hindi po mga pulis ang sumagot dyan, ha, mga citizen of Davao Region," pagklaro ni Gultiano. Dugang pa niya nga 18 anyos ug pataas lang ang respondente sa surbey.
Sumala sa PRO Davao, ang positibong "outcome" sa surbey nagpakita nga ang Dabawenyos dunay paborableng opinyon sa ahensiya tungod sa ilang gihatag nga seguridad nga naghatag og dugang kompiyansa sa ilang personahe.
Samtang bisan pipila ka mga pulis sa rehiyon nalambigit sa daghang kaso karong tuiga, naglakip sa pagpamusil gawas sa bar sa Davao City, apil na ang pagpanulis, gipaneguro ni Gultiano nga di nila i-tolerate ang mga pulis nga nalambigit sa krimen.
"Hindi po natin sila pinagtatakpan, of course we observe due process sa ating mga kapulisan, nakikita naman po ng ating mga kababayan yan. We filed appropriate charges against these people at talagang gina-imposed," pagklaro ni Gultiano.