Ang developer sa Carbon Public Market modernization project andam na sa pag-abli sa iyang labing bag-o nga atraksyon ug commercial establishment nga gitawag og “Puso Village” sa sayong bahin sa Nobiyembre ning tuiga.
Ang Cebu2World Development Inc.(C2W) niingon sa usa ka pamahayag nga gipadala sa SunStar Cebu Biyernes, Oktubre 21, 2022, nga ang proyekto karon 90 porsyento na nga nahuman ug ang nahabilin mao ang architectural ug finishing touches.
Nahimutang tupad mismo sa Compañía Marítima Building nga nag-atubang sa Mactan Channel, ang Puso Village adunay 366 ka stalls ug duha ka island pods nga magtanyag og pagkaon, RTW (ready-to-wear), gadgets and accessories, ug specialty shops.
Si C2W communications officer Gerald Rabaya niingon nga ang ilang kompaniya nigahin og P300 milyunes alang sa proyekto nga naglakip sa site ug infrastructure developments ug utility provisions.
Uban sa naglungtad nga Carbon Night Market nga nagdani sa daghang mga bisita matag katapusan sa semana, ang Puso Village maghatag sa usa ka bag-ong vibe sa lainlaing target nga merkado.
“Puso Village is positioned to be more upscale, targeting the upper socio-economic market and tourists with above-average income. Experience and vibe will totally be different from the public market and night market since the Carbon Night Market is where you’ll find the most affordable local favorites fit for everyone,” matud ni Rabaya.
Ang maong establisemento magpakita usab sa homegrown favorites ug gikahiligan nga food brands sa mga Sugbuanon, dugang ni Rabaya.
Gawas sa commercial spaces, ang C2W magbukas usab sa mechanical parking structure nga nahimutang duol sa Puso Village.
Ang istruktura usa ka puzzle-type nga mekanikal nga parking nga adunay upat ka levels ug maka-accommodate og 156 ka mga sakyanan.