Binghay: Inahan, priority 1 ka!

Binghay: Inahan, priority 1 ka!



Natural ra natong mga inahan nga unahon ang pag-atiman sa atong mga minahal gikan sa bana, mga anak lakip atong mga ginikanan, mga igsuon ug ilang pamilya maong usahay mataligam-an na lang sab pag-atiman ang kaugalingon o ba kaha mangasakit sa tumang kahago.

Matod ni Dr. Jai Ganesh, angay atimanon una nato ang atong kaugalingon kay mag-unsa man tuod atong mga hinaguan ug binuhatan kon sayo ta nga mopanaw, di ba? Busa, una ta motabang sa uban, unahon una nato pag-atiman ang atong kaugalingon.

Unsaon?

Ayaw tingba, pakyawa o hutda imong trabahuon sa usa ka adlaw aron di ka mahago. Kadaghanan sa nailhan nakong nagbuhat ini nanga-stressed sa kakapoy unya mipanaw na hinuon sa dayon busa kalma ug hinayhinay lang.

Relax! Ayaw ka konsensiya kon gusto ka nga mopahuway. Di sala ang paglingkod kon gikapoy na o kaon sa imong gustong kan-on agi’g premyo sa imong nahimo, labi na og way laing modayeg o nakakita sa imong kahago.

Ayaw pagpanuko og palit sa imong gustong kan-on, butang nga gustong maangkon (bag o sapatos) o buhaton (pamasahe, manicure, shopping). Ayaw paghuwat sa uban nga mo premyo nimo kay kasagaran di ni nila makita o madayeg imong nabuhat.

Panagsa atubanga imong kaugalingon sa samin dalang pahiyom kay makatabang kini og padasig sa kaugalingon. Ayaw pagmakuli sa pagdayeg sa kaugalingon.

Pangita og paagi nga makabakasyon o lulinghayaw kuyog imong mga paboritong higala. Panagsa kinahanglan ni nato aron di ma burn-out sa atong inadlaw-adlaw nga tulumanon.

Undangi og inum og mga sedatives o sleeping pills para makatulog kay makada-ot kini ngadto-ngadto sa atong utok ug panlawas.

I-relax sab imong utok sa pagsegi og huna-huna. Pag-medidate bisag ‘quiet time’ o lakaw-lakaw sa imong tugkaran aron makaginhawa og preskong hangin unya mapaguwa ang negatibong emosyon.

Kon maglain ang lawas, duol gilayon sa doctor aron sayong maagapan, ayaw mantiniri o matu-matuhi pagtambal ang kaugalingon aron di mosamot o madisgrasya. Hinumdumi, inahan, Priority 1 ka!

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph