Daghan na kaayong mga grupo sa mga mahiligon nga magbiseklita ang naporma base sa akong nakita sa Facebook ug personal experience sa kadalanan.
Kaingon nako nga uso-uso lang ang biseklita, apan nagkadaghan man diay sa pagpanglabay sa katuigan. Sagad sa akong nakita mga mountain biker. Ang uban kanila nag uniform.
Dunay mga grupo nga gibase sa lugar nga ilang gigikanan samtang ang uban gibase sa ilang mga frame nga mahalon.
Ang kuwang lang sa akong tan-aw mao ang education sa safe riding sa mga biker, apil na ang road courtesy.
Importante kaayo ang kahibawo sa first aid ug uban pang mga aspeto sa bike riding nga akong nakat-unan dihang nahimo kong usa sa founding members sa Tindak Bisdak Cebu Folding Bike Society ug sa Habagat night ride.
Sa bisan unsa nga ride, gikinahanglan kaayo nga dunay mga tawo nga magsilbeng pacer ug sweeper sa matag ride. Nahisgutan ko na ni but akong gibalik kay daghan nang katuigan ang nanglabay.
Di kalikayan nga dunay mga disgrasya nga mahitabo sa ride labina sa mountain biking bisan kon kadaghanan it’s a leisure sports.
Mas maayo kon dunay magdala usab og first aid kit ug kahibawo nga mogamit niini aron kon gikinahanglan madapatan gilayon og pasiunang pag-atiman ang madisgrasya.
WA MAGTAGAD
Daghan ang wa nagbuhat niini. Ang sagad sabutan oras lang ug dapit ug kon kinsa ang manguyog. Naa say uban nga iapil ang pit stop sa sabot.
Niadtong nag-organize mi og sikad sa folding bike gamit ang 20-inch wheelset padung sa Samboan, dunay grupo namo nga nagplano sa trip.
Duna pay support vehicles aron makasakay ang mga manikaray nga di na kaagwanta o kaha kargahan niadtong di na kaaguwanta sa paglahos sa 134 kilometro nga gilay-on gikan sa ground zero nga mao ang Provincial Capitol.
Tuod man, dunay kutob lang sa Argao, Dalaguete, Alcoy samtang ako nakalahutay hangtod sa Oslob. Sa akong cyclometer, nakaabot ko og 104 kilometro.
Nagtuo kong kaya ra nako ang 134, apan nasayop ko. Kuwang na lang unta og 30 kilometro apan di na makaya sa mga tuhod tungod sa kasakit na sa bikog, nagsugod na sa pagpanakit sa tuhod.
IMPORTANTE
Nganong gihisgutan ko man ni? Tungod kay duna nay mga higayon nga dunay nangamatay sa ride ug kon di man gani, nangaangol. Mas daghan ang nauwahi kay sa nahauna.
Sa miaging semana, usa ka biker ang namatay tungod kay giatake sa kasingkasing.
Tingali, kon dunay mga kauban nga nakatabang, basin maka survive pa ang biktima.
Duna say nangalamba nga bikers. Mas komon ni nga hitabo diin nangasamad ang riders. Kon mahitabo ni, duna dayoy makadapat og tambal sa samad sa rider.
Mas maayo man gud nga andam kanunay ang grupo sa mga hitabo nga ing ani.
Pinaagi sa pacer nga maoy magtakda sa speed sa ride ug sweeper nga maoy labing kusgan, way mabiyaan ug mapasagdan nga rider.
Timan-an nato kanunay ang safe riding. Mas maayong managana.