Hepe sa kapulisan sa Central Visayas mipagawas og kamandoan alang sa tanan niyang mga personnel nga hatagan og pagtagad ang kriminalidad sa ilang lugar pinaagi sa mga programa nga iyang gihan-ay sa iyang paglingkod isip director sa Police Regional Office 7.
Matod ni Police Brigadier General Roderick Augustus Alba nga kinahanglan nga paubson ang tanang mga krimen sa Central Visayas pinaagi sa sub-sub nga pagpatrolya sa mga pulis ug makita ang ilang presensya sa komunidad lakip na niini ang maayong pakigrelasyon sa publiko isip kabahin sa intelligence monitoring.
Hugot usab nga ipatuman ang mga lagda sa nagkadaiyang local government units ug pakig-alayon sa mga local chief executive aron malampuson sila sa ilang mga tinguha ug makab-ot ang programa nga gihan-ay ni PNP Chief Police General Rodolfo Azurin Jr.
“Very clear ang direction na binigay ko sa kanila. There are only three things that I want them to do. First they should be relevant of course but they have to reduce crimes. There’s so many activities na gagawin mo yan. Magpapatrolya ka nag ga-gather ka ng intelligence information. You are engaging the community, the power of critical thinking kasama na doon. You establish good relationships sa ating mga kasamahan kasama na dyan ang media,” matod ni Alba.
Dugang ni Alba nga likayan ang pagka hadlokan sa kriminalidad lakip na ang pagpugong sa kagubot sa matag hurisdiksyon nga hinimoan sa mga kriminal.
Gimandoan usab ang tanang pulis nga motrabaho sa tinarong nga paagi ug kon dunay magpabadlong dili siya magpanuko sa pagsilot niini sanglit padayon ang ilang programa nga internal cleansing.
Kon dunay angay nga pasidunggan tungod sa daghang accomplishments niini, iya kining buhaton.
Gidayeg niya ang mga police station commander nga naghimo usab sa ilang trabaho, sama sa daling kasulbaran sa pagpatay sa usa ka biyudo sa Barangay Lutac, siyudad sa Naga.
Gitigbas sa liog si Alfredo Alferez, 74, taga Sitio Ugan 1, Barangay Lutac sa maong siyudad.
Dali nga gidala ang biktima sa tambalanan apan nakabsan sa kinabuhi. Paglabay sa pila ka gutlo samtang ang suspek nga si Joanne Pansacala Omayan, 39, dali nga misibat tago sa kakahuyan, ang mga personnel sa Naga City Police Station dali nga milusad og manhunt operation ug pagka alas 11 sa gabii sa Oktubre 20, 2022 nadakpan dayon nila kini.
Tungod niini gipasidunggan ni Alba ang mga personnel nga naglangkob sa dali nga pagdakop sa suspek.
“I commend Naga City police and the force multipliers who readily assist in the speedy resolution of the killing of a 74-year-old man with the arrest of Joanne Omayan. Connection with the community is important. It brings the people together to advocate and support, especially the Philippine National Police, in its fight against all forms of criminality and lawlessness. Honest, hard-working people in the community deserve no less than our best,” matod ni Alba.
Giangkon ni Alba nga sa mga ingon niini nga krimen dili kini mapugngan apan ang buhaton sa mga pulis mao ang pagsulbad sa labing dali nga panahon.
Dili hinuon siya mohatag og time line sanglit mamahimong dili mao ang matumbok nga responsabli kon aporahon ang mga imbestigador.