Garcia: Nung ibye me ing kalingkingan… (If you should give the pinky…)

“Inya sa agyang mamangan ka man o miminum

O nanu man ing daraptan mu,

Gawan mu ngan iti para king ligaya ning Dyos.”

~ Mumunang Aklat ding Korintu¦Dangka 10: Sunis 31

(1 Corinthians 10:31)

“Ninu mang miyampang Kanakung ating lugud at tagulaling a bulung,

bulaklak, bunga o danum, tanggapan Ke ya.

O anak nang Kunti, ing sablang daraptan mu, ing sablang kakanan mu,

ing sablang yampang at pamye, pati na ring pamagdimut a daraptan mu,

dapat mung gawan mengaring ampang para Kanaku.”

~ Dalit ning Kakataskatasang Panginwan ¦Dangka 9, Sunis 26-27

(The Song of God 9: 26-27)

“Parati mu Kung isipan at magi kang talasuyu Ku.

Samban mu Ku at midaun kang pamigalang Kanaku.

Kanita dasnan Mu kung alang kamalyan. Pangaku Ku keka ini

uling ika ing Kanakung pekamakamal a kakaluguran.

Lakwan mo ngan ding sablang kauryan

ding kapanyamban at sumuku ka Kanaku.

Ikabus da ka karing sablang kablas ding kasalanan.

E ka tatakut. “

~ Dalit ning Kakataskatasang Panginwan ¦Dangka 18, Sunis 65-66

(The Song of God 18: 65-66)

***

“Ibye me ing kalingkingan—kunan da pati na ing mabilug a katawan.” Kasebyan de reng mangatwa ining maralas mararandam kanitang manga apat nang pulumbanwa ing milabas. Mangabaldugan a nung ating pasaup o manyad ditak keka, kabud mebisa na ka dagdagan na pa ing anyaran na uling abalu na nung makananu ka kaganaka at isip na malyari ka palang mulangan, nung e man labis-labis kayap at ganaka.

Kaybat na nita, gawan na ing agyu nang gawan a alit o tricks bang akwa na pa ing malyari nang akwang dagdag ketang sadyang ditak mung pekisabi nang mayap at inanyad na. Ikit na ing lambut ning pusu mu. King isip na--malyari ka palang bilugan buntuk!

Antita la reng aliwang tau, nung e man keraklan karela. Mapanyamantala la king ganaka at kayapan da reng aliwa. Nung kapilan mu dirinan kanita da ka pa lakwas anyawaran. Itang bala da tungkulan mu na ing pamagkalub karing balang kaylangan o anyaran da keka.

Dapot ing Apung Ginu e ya antita. E na kaylangan ing dakal o maragul a bage ibye mu Kaya ba’Yang tumula keka. E na kaylangan ing tipak-tipak a gintu o dakal a makislap a sula. E na kaylangan ing manibag kang bunduk para mu Kaya. E na kaylangan ing kawen o dalakitan me ing dayat malat ba’mung apakit kaya ing lugud mu Kaya. E na kaylangan mitalakad kang maragul at gawa king gintu, o miyayaliwang makislap a batung gusali o kayaryan para Kaya. E na kaylangan ing magtau kang magpakabsi karing kata-kata.

Anti kanitang ating ari ding matsing a meyaus Hanuman a mamalugse at mitatalatag mangaragul a batu keng dayat malat manibat king Mawling Bharat Varsha o India ngeni) papunta king Lanka (Sri Lanka ngeni) king kapagnasang makasaup a abulus de ri Aring Rama at Laksamana ing Maharani Sita king pangasukul na king kayaryan king gubat nang Aring Ravana. Makabang pisasabyan ita inya ibalaus taya king salusad a mamalugse mangalating batu bang asopan i Hanuman.

Kayakit nang Hanuman king salusad a balamu manyayang mung pagal, mengapasagakgak yang meyli at pigsisti ne iti. “Lumele na ka kyan, salusad”, nganang sinabi. Salasalabat ka mu at e na ka man makasaup ngana. Kabud-abud ikit neng Aring Rama ing malilyari inya sebyanan ne i Hanuman. “Balu mo, Hanuman, malati man ing gagawan na ning salusad ayan, alang pamiyaliwa keng gagawan mu. Pante kayu mu kasuywan para Kanaku. Ibg malating bage gagawan na malati mu kasi malati ya mu katawan Ika mangaragul pin ing gagawan mu kasi maragul na ka man katawan.”

Mangabaldugan a nung nanu ing agyu mung gawan—maragul man o malati—pante mu ita keng lawe ning Ginu. Ing pekamaulaga ya pin ing kapakumbaban mu at ing kapagnasan mung tapat at dalise apamatulan me ing Ginu king kasuywan a tatagulaling mu para Kaya.

Para king Ginu ing dinat o gintu alang pamiyaliwa. Ala na Ya mang kaylangan kekatamu uling bandi na ngan ing sabla. Kaya ngan ing segana-gana. E na naman kaylangan ing dinan ta’Yang nanu mang bage ibat king labwad. Ing pekamaulagang-dili ya pin ing lugud tamu Kaya—ing tapat, dalise at mapakumbabang lugud tamung manibatan karing pusu tamu para Kaya.

***

Dake Talabaldugan:

1. milupung (pangdiwa) mipulung mu naman; maglaguma; mitipun bang misabi-sabi o gawa anting metung a pasya. English – to gather, to meet as a group, have a session. Alimbawa king pamangamit: “E la sadyang mikakasundu dapot iukwa da mu ring mesalese inyang apikasundu rang milupung bang samasnan ing nanu mang sigalut.”

2. milura (pangdiwa) miyapsa, milwal king asbuk kaybat sinubu; mibugka. English – got spit out, spat; did expectorate, hawked, did gob, did hoicked. Alimbawa king pamangamit: “Kamal pa mo ing seli dang sabo buku keng delanan dang tindangan milura mu kaybat nang mengapanilak ning binatilyung masakit.”

***

MIKASING-KABALDUGANG at MISALUNGAT

KABALDUGANG AMANU TAMU

ipalad – pamipakit king metung a bage gamit o kapamilatan ning o ding palad karing aliwa.

ipakit – itulid karing mata bang akit.

ipalto – ipakit o ipalad ing sadyang makasalikut o sasalikut o sadyang makapampan.

iyapse – pamipasyag king nanu mang bage sukat ipabalyu lakwas na ing katutwan.

idake – papabalung bage a e sukat sarilinan.

iyapag – itumpak, ikabit ing metung a bage bang akit, abalu o nabangnan da ring aliwa.

ilantad – makasalikut a papalto king masala o karing mata o king panakit ding aliwa.

ibulalag – binit a pamipabalu king metung o migit pa karing aliwang bage lakwas na karing malda.

ipasyag – kapanamdaman a sukat ipakit, ilantad, ipabalu o sabyan karing aliwa lakwas na karing pilingaran.

***

Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king garciakragi@yahoo.com/ mag-text o maus para karing kutang o munikala: 0942-3924-399 o 0945-3795-270.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph