Napili si Brgy. Ginebra Gin Kings guard Scottie Thompson isip bag-ong Cignal Play-Press Corps Player of the Week awardee sa Philippine Basketball Association (PBA) Commissioner’s Cup.
Sa grabeng kayod nga gipagawas ni Thompson, natabangan niya ang Gin Kings aron mabuntog ang Magnolia Ang Pambansang Manok Hotshots, 103-97, niadtong Dominggo, Oktubre 23, 2022.
Ning maong sangkaa, kanunay nga naggukod ang Gin Kings apan sa pagtibangay sa ilang mga sakop, nakuha nila ang makutas nga kadaugan.
Ubay-ubay ang makonsiderar nga bayani sa Gin Kings ning maong duwaa apan ang kaagresibo ni Thompson sa opensa ug depensa sa hinapos nga bahin maoy naghatag og labad sa ulo sa Hotshots.
Krusyal nga 14 puntos ang natampo ni Thompson ning duwaa gawas sa iyang depensa.
Pagkahuman sa duwa, gihulagway ni Ginebra coach Tim Cone si Thompson nga sama ni basketball legend Robert Jaworski, kinsa kanhi playing coach sa Gin Kings.