Ang tanang international ug domestic flights paingon ug gikan sa Mactan International Airport (MCIA) mahimong fully operational sa Miyerkules, Oktubre 26, 2022.
Mao kini ang gisulti ni Julius “Jayjay” Neri Jr., general manager sa Mactan Cebu International Airport Authority (MCIAA), ngadto sa SunStar Cebu, Lunes sa hapon, Oktubre 24, nunot sa temporaryong pagsuspenso sa tanang flights sukad sa Lunes sa kaadlawon.
Usa ka Korean Air flight KE631 gikan sa Incheon, South Korea, nilapas sa runway sa pag-landing taliwala sa kusog nga ulan sa alas 11:11 sa gabii sa Dominggo, Oktubre 23, 2022.
Si Neri niingon nga sila naningkamot nga mabalhin ang eroplano ngadto sa mas luwas nga dapit sa karon, Oktubre 25, 2022.
Hinuon, iyang gipasabot nga dili nila maseguro nga makuha ang eroplano hangtod nga dili nila kini mahimo tungod kay wala silay nahibaw-an kon unsa ka lisud tungod kay lapok ang lugar kon mag-ulan na usab karong adlawa.
“There are many factors but the timetable is to be able to at least partially open the airport tomorrow and or maybe early tomorrow and maybe later than the day hopefully and by Wednesday, fully operational na balik. That’s the goal but dili pa gyud ta kasiguro,” matud ni Neri.
Tungod sa obstruction sa runway, si Neri niingon nga dili sila makatugot sa bisan unsang eroplano nga motugpa o mo-take off, apan iyang gitataw nga anaa sila sa proseso sa pagkuha og pagtugot gikan sa Civil Aviation Authority of the Philippines (CAAP) aron tugotan ang unom ka mga eroplano nga makalupad.
Namatikdan nga ang stranded nga mga pasahero nagpaabot na lang sa gawas sa airport.
Siya nidugang nga ang ilang tumong mao ang partially open sa runway una pinaagi sa pagtugot sa gagmay nga mga eroplano sa paggamit sa layo nga bahin gikan sa nadaut nga eroplano, apan ang tanan kinahanglan nga coordinated.
Giklaro ni Neri nga wala direkta nga nakababag sa runway ang abyon apan gihimug-atan niya nga adunay mga standard nga kinahanglan nilang tumanon sama sa gilay-on o kataas sa obstacle gikan sa runway.
Ang ilang gihimo hangtod karon mao ang pagpahunong sa tanan nga operasyon ug pagluwas sa tanan nga 173 ka mga pasahero, lakip ang mga tripulante, nga giingon niya nga luwas sa insidente.
Ila usab nga gipaniguro nga ilang gi-offload ang mga bagahe aron mogaan ang eroplano ug makuha ang pipila ka mga mahalong butang sama sa kuwarta ug mga pasaporte sa mga pasahero.
Matod ni Neri, ang tanang gasolina gisuyop gikan sa eroplano aron malikayan ang peligro atol sa rescue operation.
Matod niya nga ila usab nga gisiguro nga ang mga pasahero maproseso pinaagi sa immigration sanglit silang tanan gikan man sa gawas sa nasod.
“Once they pass the immigration, then they could now go to their respective destinations or kon naa silay mga problema pa, ilang flight connecting, then book them hotels bayaran na sa airlines,” dason ni Neri nga ilang tumong nga dili mag-antos ang mga pasahero.