Daghang nahingangha dihang gitudlo ni Presidente Ferdinand “Bongbong” Marcos Jr. si kanhi PNP Chief Camilo “Pikoy”Cascolan isip bag-ong undersecretary sa Department of Health (DOH). Gikompirmar sa DOH nga nadawat sa ilang buhatan ang appointment papers ni Cascolan uban sa nagkadaiyang mga opisyal nga gitudlo usab ni Marcos.
Wa pa masuta kon unsay gimbuhaton ni Cascolan sa DOH, kansang buhatan wa pay gitudlo nga kalihim sukad nilingkod si Marcos sa Malacañang.
Ang tigpamaba sa ahensiya kaniadto nga si Dr. Rosario Vergeire mao una ang gitudlo karon nga officer-in-charge.
Matod sa Presidente nga motudlo siya og health secretary sa higayon nga mahimong normal na ang sitwasyon sa Covid-19 sa nasod.
Si Cascolan namahayag nga bisan di siya doctor apan wa kinahanglana nga doctor ka aron masud ka DOH.
Nitataw siya nga ang “administration and management” kanunay nga anaa sa matag buhatan nga dako siya og matabang ning dapita ug makahatag siyag ideya sa pakigbatok sa Covid 19 lakip sa ubang mga isyu nga may kalambigitan sa panglawas.
Di man ta supak sa iyang pagkatudlo kay ang matag tawo gigrasyahan man og kaalam sa Ginoo. Maayo unta nga ang iyang kasinatian isip tigprotehir sa katawhan dihang siyay nangulo sa kapulisan magamit niya aron mapatunhay ang mga programa sa DOH.
Nagkinahanglan ta karon og tawo sa DOH nga makahatag og direksyon sa Pilipinas kon asa ta paingon ning atong padayon nga pagsinati sa Covid- 19.
Tawo nga may kaalam sa panglawas ug medisina aron may kasulbaran ning pandemya nga giatubang ta.
Nisupak ang Alliance of Health Workers (AHW) ning pagkatudlo ni Cascolan nga nadestino kaniadto sa dakbayan sa Cebu aron mangulo sa Central Visayas ASG Command niadtong 2007.
Ang pagkatudlo sa labing unang taga Cordillera nga nangulo sa PNP gihulagway sa AHW nga dakong insulto ngadto sa mga eksperto sa panglawas nga maoy kwalipikado nga mopadagan sa operasyon sa DOH ug tataw nga way pagtagad si Marcos sa kinabuhi, panglawas, kaluwasan ug kaayohan sa mga health worker ug sa kinatibuk-ang Pilipinhon. (josephelvirtubilan@gmail.com)