Usa ang patay human nadunggaban atol sa karambola sa duha ka mga grupo sa mga batan-on ala 1:20 sa Miyerkules sa kaadlawon, Oktubre 26, atol sa disco sa Brgy. Northern Poblacion, lungsod sa San Francisco, mga Isla sa Camotes.
Ang biktima nga namatay sa samad dinunggaban sa buko-buko giila sa kapulisan nga si Insohanes Otida Bancale, 21, taga Brgy. Cabungaan, San Francisco.
Ang mga suspek giilang sila si Kevin Luke Baring Abangan, 19, tinun-an, taga Sitio Pamatasan, Brgy. Northern Poblacion, San Francisco, ug si John Bert Almacin Elaida, 22, tinun-an, taga Sitio Pamatasan, Brgy. Northern Poblacion.
Matod sa kapulisan nga dunay disco ug kompetisyon sa sayaw nga gipahigayon nunot sa kapistahan sa barangay sa Biyernes, Oktubre 28.
Sa kalit lang duha ka mga grupo nagrambol sulod sa diskohan ug naabot sa gawas diin didto na nadunggaban si Bancale.
Sila si Abangan ug Elaida nasikop mga alas 8 pasado sa Miyerkules sa gabii.
Sa pagsuwat ning taho, nagpadayon pa ang imbestigasyon. (GPL)