Ang Cebu City Government nag-andam og P176.45 milyunes para sa distribution sa tag P2,000 ngadto sa 88,227 ka senior citizens nga kwalipikadong makadawat sa financial assistance para sa Septiyembre ug Oktubre karong adlawa, Oktubre 28, 2022.
Kini ang gibutyag ni Vicente Esmeña, pangulo sa Office of Senior Citizens Affairs (Osca), sanglit ang pundo nga gitagana kanila nalakip sa P1.3 bilyones nga supplemental budget (SB) ug giaprobahan sa City Council atol sa regular session niadtong Oktubre 25.
Si Dr. Ester Concha, pangulo sa Department of Social Welfare and Services (DSWS), nagkanayon nga ang tibuok pwersa sa City Government ang naglangkob sa distribution nga gidungan sa birthday ni Mayor Michael Rama.
Ang DSWS maoy gitahasan sa distribution sa mountain barangays nga nahimutang sa north ug south district samtang ang laing 27 ka mga departamento gitugyanan na og barangay para maoy ilang hatagan sa ayuda.
Ang City Ordinance ni Konsehal Noel Wenceslao labot sa SB3 direyot wala mapasar sanglit gikwestyon sa minority sa Konseho pinaagi ni Konsehal Nestor Archival ang proseso niini sanglit sa ihap sa minority leader, anaa pa kini sa first reading.
Apan dihang gipangutana si Atty. Charrise Piramide, secretary sa Sangguniang Panlungsod, nagkanayon nga base sa naandan nga proseso sa Konseho, human sa referal ngadto sa committee on budget and finance, nisugod na ang first reading ug ang ikaduha mao ang pagpahigayon sa budget deliberation ug niadtong Oktubre 25 ang third reading kun final deliberation.
Si Wenceslao niduso sa iyang motion sanglit siya nagtuo nga kini maoy ikatulong pagbasa ug gisegundahan sa iyang kaubang konsehal.
Sila si Konsehal Mary Ann Delos Santos ug Archival wala ningsupak apan nipalanog sa ilang manifestation nga kinahanglan sundon kon unsay nalatid sa patakaran hilabi na nga naglangkob kini og dako nga kantidad.
Nilanat og dul-an 30 minutos ang debate sa mga local nga magbabalaod ug sa kauwahian, nipatigbabaw ang mayoriya nga kaalyado ni Rama.
Ang mga senior citizen moadto lang sa venue sa ilang tagsatagsa ka barangay ug magdala sa ilang identification card nga giisyu gikan sa Osca, ballpen ug dili na usab i-honor ang authorization letter sa pagkobra sa hinabang.