Daghan na ko og lindog mahitungod sa relasyon sa magtiayon apan karong adlawa akong tutukan ang mga butang ug pulong nga daling maka-irita ni Mister aron ma hinayhinay kini pag kontrol ni Misis ug magmalipayon si Mister.

Numero unong kontra sa mga bana ang mga asawang nagger, labi na tong segi og pamaghot, lupig pay nag-uwang nga iro. Pananglitan magsegi og yawyaw ‘hubog na sab ka!, diin naman sab ka naglaag bu-anga ka!, wa na gyod kay pag-asang mausab sa kabadlungon hinampaka ka!’.

Motubag sab ang bana mura ka’g plakang guba segi’g balik balik, nabungol na ko anang imong yaw-yaw maong feeling nila wa na kay respito nila unya nagka-minus nga di man unta sila bungol.

Ang mga bana di sab ni ganahan nga segihan og tawag labi na og naa sa trabahoan kay maputol na man hinuon sila sa ilang gibuhat labi na kon way lingaw si Misis sa balay unya balik balik og tawag para mangumusta, unsay gibuhat, unsang orasa mouli, etc.

Kuyaw pa gyod matangtang sa trabaho si Mister labi na og ginadili sa kompaniya ang pagtubag sa telepono panahon sa ting trabaho gawas kon emergency.

Sunod ang paghatag og space sa usag-usa. Panagsa ang bana makigkuyog sa mga amigo kay mag-inum, duwa og basketball o chickang panlalaki. Ayaw kini hikawi o higti, pasuruya sab panagsa aron di matuak iyang paminaw.

Para ni Mister may oras para sa trabaho, may oras para sa barkada, may oras sa pamilya, ug may oras sab para kang misis.

Di sab kanahan ang mga bana sa mga asawang gastador, mga bilmoko, labi na og di managhid kon unsay paliton bisag sila pang duha ang nangita o mas dako pa og sweldo si Misis. Agi’g respito, angay gyod mananghid ug magsabot.

Di sab ganahan ang mga bana sa mga asawa nga wa nay atiman ug pangareglar sa kaugalingon labi na kon may mga anak na. Mao ni usahay rason nganong makalingi ug matintal sa ubang seksing binuhat. Dapat kitang mga asawa mag-atiman sab sa atong kaugalingon susama niadtong dalaga pa ta.

Respito ang gikinahanglan kay a happy husband, is a happy life!