Hapit kada adlaw makita sa social media ang mga aksidente nga naglambigit sa mga motorsiklo sa dakbayan sa Sugbo. Maghilak ang adlaw kon way i-post sa socmed nga CCTV footage nga nagpakita sa aksidente nga naglambigit sa motorsiklo ug laing sakyanan.
But maihap kaayo ang mga aksidente sa mga biseklita bisan tuod kon daghang mga buluyagon aning mga nagtrabaho gamit ang biseklita. Niadtong Biyernes nilupad og kadiyot ang akong espiritu kay nikalit lang og liko ang usa ka biseklita sa dayon na sab nakong liko sa D. Jakosalem. Wa ko nag expect kay one way na nga portion.
Nganong di man kanunay malambigit ang bikers og aksidente sa karsada? Tungod kay slow moving busa duna pay panahon nga makahunong o makalikay ang laing sakyanan.
Apan kon tipunon na sa kasamtangan karon nga bike lane ang motorsiklo ug biseklita, kon di dugangan ang kalapdon sa lane, seguradong magbaha ang mga aksidente sa motorsiklo ug biseklita.
Maihap ra gud ning mga siaw sa biseklita apan sa motorsiklo gabaha. Tan-awa lang gud na kon hatagan og bentaha, maglumba sa karsada. Mao pay masuko kon buyagon.
KATARUNGAN
Apan ingon pa sa usa ka opisyal sa Cebu City Transportation Office (CCTO) nga paigo na kuno na ang gilapdon sa lane. Kana lagi kon maglinya sa pagpadagan nga ingon sa mga sosu ang mga nagmotor. Apan di man ni maoy mahitabo kay bisan gani sa lane filtering mag-ilog pa. Segurado ning makig-ilog ning mga nagmotorsiklo sa laing nagmotor ug nagbiseklita taliwa sa kagamay sa lane.
Ambot kon kada adlaw ba kaha nga nagmotor ug nagbiseklita subay sa mga bike lane ning pipila ka mga opisyal sa CCTO aron unta sila makaobserbar.
Sa ako nang giingon nga way problema nang tipunon ang nagmotor ug nagbiseklita basta pun-an ang kalapdon sa lane aron dunay igong space pagmaneobra.
Gawas ini, kinahanglan tingali nga amendahan ang ordinansa sa Siyudad, kana kon di molapas sa nasudnong balaud sa trapiko, nga naglatid sa pagpasubay sa mga motorsiklo sa usa lang ka lane.
Kay kini ra bang mga motorsiklo karon di na slow moving, di sama kaniadto nga hinay ang arangkada. Unya ang balaud sa trapiko wa pa ni maamendahi pahaum sa panahon karon.
BIG BIKERS
Apan mosugot kaha ang mga adunahan nga big bikers niini? Nagduha-duha ko. Unya makapatuman kaha ang mga awtoridad sa balaud alang ning big bikers nga ang uban kanila feeling kaayo nga tag-iya sa karsada? Naa pay blinkers nga gipangtaud nga maora sab sila og mga awtoridad.
Kon di man gani makapatuman, ayaw na lang kay descriminatory man nang inyoha. Sama gud aning kapulisan nga mag checkpoint, mga motorsiklo nga gagmay og CC ray sagad parahon. Matod sa usa nako ka higalang dako og motor, papasayluhon ra sila sa mga checkpoint kay dagko ang CC sa iyang mga motorsiklo.
Kon di mo makapatuman og patas sa balaud, ayaw na lang na ninyo ipatuman ang lane sa motorsiklo.