Gilauman sa Davao City Overland Transport Terminal nga magpunsisok ang mga pasahero uban ang padayon nga pagbiyahe sa mga bus atol sa adlaw sa kalag-kalag sa Nobyembre 1, Martes, ug Nobyembre 2, Miyerkules, matud pa ni manager Aisa Usop niadtong Oktubre 28.
Mga 1,500 hangtud 2,000 ka mga biyahe sa bus ang gilauman matag adlaw sa DCOTT sa Nobyembre 1, nga moalagad sa mga 85,000 hangtud 100,000 ka pasahero.
Matud ni Usop nga kini mas taas itandi sa kanhi mga tuig atol sa samang panahon, nga duna la'y mga 1,000 hangtud 1,500 ka biyahe sa bus.
"Nakita na gyud nato na naga-start na gyud ang atong mga biyaheros nga mobiyahe na gyud sila. Ing-ani nga morning, if dili peak days, wala pa kaayo pasahero. Pero karon ubay-ubay na," tug-an sa manedyer sa paghinabi kaniya sa radyo.
Mga biyahe sa bus magpadayon hangtud karong adlawa nga special non-working holidays. Oktubre 31 ug sa Nobyembre 1 tungod kay mga kompaniya sa bus mas nagpanikad nga makapasakay og mga pasahero aron nga mokita ug makarekober sa ilang hinay nga kita atol sa pandemya.
"Inform pud nato ang mga biyahero nga magsayo sila diri sa DCOTT para makita pud sa mga bus operators nga ubay-ubay ang mga pasahero ug aron maka-ready ang mga buses," awhag ni Usop.
Aron nga maalagaran ang pagdagsa sa mga pasahero, sumala ni Usop nga nakigkoordinar na sila sa Southern Mindanao Bus Operators Association (SMBOA) aron nga mangandam og mga bus aron nga mobiyahe por in kaso dunay daghang mga pasahero.
Mihatag sab ang Land Transportation Franchising and Regulatory Board sa Davao Region (LTFRB-Davao) og special permits sa mga bus operators aron nga tugtan sila nga mobiyahe atol ning panahona.
Sa pikas bahin, ang LTFRB-Davao nilusad og surprisang drug test sa 350 ka drayber ug kondutor gikan sa DCOTT, Gaisano Mall Van Terminal, ug Digos City Bus Terminal kon diin pito ang nagpositibo sa inisyal nga imbukada.
Duha ka drayber sa bus sa DCOTT, duha ka drayber sa taksi gikan sa Gaisano Mall Van Terminal, ug usa ka drayber sa bus ug duha ka konduktor gikan sa Digos City Bus Terminal.
"As per the Philippine Drug Enforcement Agency, the individuals who tested positive during the initial screening will still be subjected to confirmatory testing," pasalig sa LTFRB-Davao.
Sumala kang Executive Order No. 7 ni President Ferdinand “BongBong” Marcos Jr. ang pagsul-ob og face mask kinahanglan pa sa public transportation.
Bisan tuod kon ang face mask opsiyonal na sa outdoor settings, gikanayon ni Usop nga mga pasahero, apil ang mga drayber ug konduktor kinahanglan nga magsul-ob og face masks sa DCOTT ug uban pang mga terminal tungod kay daghan mga tawo ang gilauman.