Bag-o na ang hepe sa kapulisan sa probinsya sa Bohol human giinstalar ni Police Brigadier General Roderick Augustus Alba si Police Colonel Lorenzo Alfeche Batuan, nga lumad Bol-anon, hulip kang Police Colonel Osmundo Salibo, nga pinitsahan og Oktubre 21, 2022.
Gihimo ang assumption of office sa conference room sa Police Regional Office 7 (PRO) 7 sa Biyernes, Oktubre 28, 2022 atol sa pagkusokuso sa Bagyong Paeng.
Si Batuan, sakop sa Philippine National Police Academy (PNPA) Magilas Class of 2000 ug kanhi deputy provincial director for administration sa Bohol Police Provincial Office (BPPO).
Si Batuan nagpasalamat sa pagtudlo kaniya isip hepe sa kapulisan sa iyang yutang natawhan human nga siya ang nauyonan sa gobernador.
Iyang gisaad nga buhaton kutob sa iyang mahimo aron magmalinawon ang tibuok lalawigan sa Bohol pinaagi sa pagpakatap sa kapulisan sa karsada.
Tinguha niya nga maminusan ang kriminalidad, illegal nga drugas, illegal nga sugal ug uban pa pinaagi sa pagpabaha sa mga unifomed personnel sa kadalanan.
“Kay ako may gipili sa atong gobernador, he is expecting nga ma-sustain nato ang atong kampanya against especially sa illegal drugs, illegal gambling and then siyempre, maningkamot ta nga mas ma-reduce pa nato ang street crimes. Mao na nga ang akong plano aside from the usual campaign plans nato against illegal drugs, gambling wanted persons, loose firearms dapat ang atong kapulisan ang ilang presence naa sa kalsada,” matod ni Batuan.
Gusto niya nga ang tanang municipal police stations nagpahigayon og checkpoint ug beat patrol operations.
Daghan og pamaagi sa beat patrol sama sa pagbaktas sa karsada ug magbisiklita, matod niya.
Lakip sa iyang susihon ang organizational structure sa BPPO ug unsa usab ang ilang gipangbuhat.
Nabantayan niya nga dunay mga section sa provincial command nga nanubra na ang mga personnel nga angay na nga kuhaan aron ipakatap sa kadalanan. Tungod niini, posibling dunay gamay nga lahugay nga himuon si Batuan sa provincial command.
“I will let the staff officers to present the organizational structure, ano ang work load nya ano ang score card nya ano ang ginagawa nya sa opisina. Kung hindi nila yan ma justify eh, babawasan po natin yun at ilalagay sa kalsada,” matod ni Batuan.
Mando ni Alba kang Batuan nga dili pasagdan ang public safety sa tibuok lalawigan sa Bohol ug ipatuman ang mga programa sa PNP sama sa anti-criminality.
Masaligon ang heneral sa bag-ong provincial director sanglit taga Bohol kini ug nasayod na siya unsay angay nga buhaton sa mga lungsod nga dunay problema.
“Advantage sa kanya because he is from that place, he was once assigned doon napakatagal and he knows the place already,” matod ni Alba.
Andam na usab sila sa pagpakatap sa mga pulis sa tanang mga sementeryo sa tibuok lalawigan alang sa siguridad sa Kalagkalag.