"Ya pin ing pakalulu ning Ginu inya e tamu mangayna,
uling ing pangamakalunus na e sasala.
Bayu la balang abak: dakila ing kekang katapatan.”
~ Pamaglugma ¦Dangka 2: Sunis 22-23
(Lamentations 3:22-23)
"Ing Ginu mayap ya karing sabla:
at ing banayad nang pakalulu malaganas la karing sablang dapat na.”
~ Dalit ¦Dangka 145: Sunis 9
(Psalm 145:9)
"Pamatulan mu ing sarili mu king Ginu;
at ipagkalub na la ding kapagnasan ning pusu mu.”
~ Dalit ¦Dangka 37: Sunis 4
(Psalm 37:4)
"Ninu ing Dyos a kapara mu, a magpatawad karing sala...
Uling matula ya king pakalulu...Mikalunus ya kekatamu;
Saulan na la ring kekatamung kasalanan; at ibalugse na la ngan
ding karelang kasalanan karing kalalamlalaman ning dayat malat.”
~Mika ¦Dangka 7: Sunis 18-19
"Ing pakalulu ning Ginu manibat king alang angga angga king alang angga
karelang tatakut Kaya, at ing katalarwan na karing anak ding anak.”
~ Dalit ¦Dangka 103: Sunis 17
(Psalm 103:17)
“Inya sa’t sukat tamung ‘pasalamat king Ginu da ring ginu:
uling ing pakalulu na mandatila king alang angga.’”
~ Dalit ¦Dangka 136: Sunis 3
(Psalm 136:3)
"Ing sablang upaya mipagkalub kanaku king banwa’t labwad...
at lawen mu, abe yu Ku parati, agyang king kapupusan na ning labwad.”
~ Mateu ¦Dangka 28: Sunis 18-20
(Matthew 28:18-20)
"Paslagan ne ing Kayang aldo karing mangarok at karing mangayap,
at parala Yang uran karing e makatud at karing e makatud.”
~ Mateu ¦Dangka 5: Sunis 45
(Matthew 5:45)
***
Mapilan la mu karing e bilang-bilang a patune ding Banal a kasulatan ding mesambitlang makapayuna dikil king alang panayang kapalit, e mangabiran at alang anggang pakalulu ning Ginung Kakataskatasan. Anti king aldo a mamanlag nu man karin at uran a papatak nu man karin at kaninu man—ala yang akakit a pamiyaliwa karing ninu man o nanu man ing pakalulu Na.
E Na katamu kalupa nung pakalulu at lugud ing pisasabyan at ing pakalulu Na ya ing patune king Kayang lugud kekatamu.
Itamu lulugud tamu uling luluguran da katamu mu naman. Ing Ginu kaluguran na katamu agyang e ta’Ya kaluguran o agyang kasaman ta’Ya at agyang e ta’Ya sasalpantayanan anti kareng alang-Dyos kekatamu o ding atheists. E ta’Ya sukat iyapus ing Ginu kekatamu uling itamu buri tamu atin ngang sukli o kapalit ing sablang daraptan tamu. Buri tamu mu detang makiburi kekatamu at ila ring kakabiran tamu. Ing lugud para karing keraklan kekatamu angga mu king anggang kapilan ya malagu o masanting ing “luluguran” tamu.
Pakamalan na la ring mabandi at masalapi; pakamalan na la ring mayna at masikan; pakamalan Na la ring sikat at ding alang makakilala; pakamalan na la ring anak at ding matwa; pakamalan na la ring malagu, masanting at pakamalan na la ding sasalpantaya Kaya pati na ding e sasalpantaya Kaya dit mu man; pakamalan na la ding makayangat at lakwas na ding pekamasaldak dili.
Ala yang tutulak o kakabiran. Kakaulan Na la ngan ding balang metung kekatamu.
E Ya anti karing tuturu da ring magsangkan-sangkan a pantas king kasalpantayanan at lakwas na king pamaglugud Kaya—a Ya ibaldug Na la ding makasalanan king alang anggang parusa o “hell.". Ing pakalulu at lunus ning Ginung Kakatasakatasan alang panayang kapalit, e mangabiran at alang kapupusan—uling ing alang-anggang parusa o ing hell salungat ya king katutwan ning alang anggang lugud at alang-anggang pakalulu ning Ginu.
Kabud lakbang kang makatamisan papunta Kaya, Ya naman lakbang yang makatadinalan papunta keka. E ka man bisang lumapit Kaya king kekaban ning panaun—manenaya Ne man king kekaban ning panaun angga na king alang-angga bang lumapit ka mu rin Kaya king katatawlyan. E ya sasawa, e ya papagal at e ya susuku king pamaglugud Na keka at kekatamu ngan kakilala ta Ya man o ali; sasalpantayanan ta’Ya man o ali; paulagan ta Ya man o ali; pakamalan ta Ya man o ali.
***
Dake Talabaldugan:
1. miluslus (pangdiwa) makapunta king marayung dane o lugar, aliwang balen po lalawigan . English – be able to travel or take a trip to a far town or city. Alimbawa king pamangamit: “Kaybat ning adwa at kapitnang banwa, miluslus ne ya mu rin i Sitang king Binyang, Laguna nung nu da ya panayan deng pisan at aliwa nang kamaganak.”
2. milusung¹ (pangdiwa) makayalug o makatalbug bitis pati na katawan king danum. English – be able to submerge one’s feet or body into the flood or body of water. Alimbawa king pamangamit: “Gagad neng bisang milusung kanita pa ing bingut uling asne kaburing mabyasa agyang kawe mung asu ing balu na.”
***
MIKASING-KABALDUGANG at MISALUNGAT
KABALDUGANG AMANU TAMU
mipataloto – pisasabyan, taltalan o kapalyaryan a e mayari-yari o e magwakas.
mipalambat – nanu mang bage a e meyari king makuyad o saguling paralan.
melwat – nanu mang bage a e meyari king makuyad o saguling paralan. Kasingkabaldugan na mu naman ning mipalambat.
miyatsat – anti king sati o pisi a mengaigut o mengabatak inya mipakaba kesa king sadya.
mipakaba – bage o kapalyaryan a e meyari o e migwakas mabilis nung e bala e na bisang maputut, mapatlud o mayari pauli ning nanu mang bage kaburyan o ali.
***
Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king garciakragi@yahoo.com/ mag-text o maus para karing kutang o munikala: 0942-3924-399 o 0945-3795-270.