PADAYON ang pagpangalap og donasyon ang lokal nga panggamhanan sa Davao alang sa grabeng naapektuhan nga mga biktima sa Bagyong Paeng aron nga makaabag ngadto kanila.
Lunes, Oktubre 31, 2022, gipahibawo sa lokal nga panggamhanan sa Davao nga nagadawat sila og mga donasyon gikan sa Dabawenyos kinsa buot nga motabang sa bag-o pang naapektuhan sa Bagyong Paeng nga nagdala og kadaut sa propedad ug mikalas aog daghang kinabuhi kasagaran sa rehiyon sa Bangsamoro Autonomous Region in Muslim Mindanao (Barmm), ilabi na sa Maguindanao, Basilan, Lanao del Sur, Tawi-Tawi ug Sulu, Cotabato City, Zamboanga City ug ang mga munisipalidad sa Sirawai sa Zamboanga del Norte, apil na ang Albay, Aklan ug sa Island Garden City of Samal.
Subay sa ilang Facebook post, makahimo ang mga Dabawenyos sa pagpadala og donasyon ngadto sa ilang gitagana nga mga drop-off areas. Ang drop-off point 1 naa sa Rizal Park (tapad sa Davao City Hall) kon diin ang mga donasyon bukas sugod pa Lunes, Oktubre 31, hangtud Nobyembre 5 alas 8:00 sa buntag hangtud 5:00 sa hapon ug kontaka si Cheryl Sumalinog sa numero 0932 637 0315.
Samtang ang send drop-off point naa sa Task Force Davao HQ, Sta. Ana Wharf, Davao City. Mga donasyon dawaton sugod Lunes, Oktubre 31 hangtud Nobyembre 5, gikan sa 7:00 sa buntag hangtud 7:00 sa gabii. Mahimo makontak si Bob Bulaclac sa numero 0963 261 8484.
Gikanayon sa lokal nga panggamhanan nga mga Dabawenyo mahimong modonar sa mga mosunod; pagkaon (andam nang kan-on), bottled water, hygiene kits, mga katulgan (banig, habol), kutsara ug tinidor, kendi, ug mga duwaan (alang sa psychosocial intervention sa kabataan).
Nagkinahanglan sab sila sa mga mosunod nga tambal; cefuroxime 500mg tabs, co-amoxiclav 625mg/1gm tab
cefixime 200mg cap, clindamycin 300mg cam, losartan 50/100mg tab, amlodipine 5/10mg tab, metformin 500mg tab, antibiotic ointment, mefenamic acid 500mg cap, celecoxib 200/400mg, metformin 500mg tab, metoclopramide tab, calmoseptine cream, tetanus toxoid, cefuroxime 250mg/5ml susp, co-amoxiclav 250mg/112.5/5ml susp, metoclopramide syrup, salbutamol syrup, nebulizer, nebulizing kit, ug salbutamol nebule.
Samtang ang National Disaster Risk Reduction and Management Council (NDRRMC) nagkanayon pinaagi sa situational report nga si Paeng nakaapekto sa 1,953,814 ka tawo, o 590,990 pamilya, sa 5,108 ka barangays, uban ang 309,218 ka mga tawo o 83,243 ka pamilya nga nadiskolar.
Damyos sa inprastraktura, nga naglakip sa ospital, mga buhatan sa kagamhanan, tulunghaan, ug simbahan gibanabana nga mokantidad kapin og P757 milyon, samtang damyos sa agrikultura mitaas gikan sa inisyal nga pagbanabana nga P55 milyon ngadto sa kapin P435 milyon.