Ang mga traffic enforcer sa Cebu City Transportation Office (CCTO) makabaton na unya og high visibility clothing nga maoy ilang gamiton sa pagdumala sa trapiko sa kadalanan sa dakbayan sa Sugbo panahon sa kusog nga uwan.
Kini ang gipahibawo ni Atty. Koko Holganza, chairman sa Board of Directors sa CCTO alang sa kaluwasan sa ilang mga personnel nga nagdumala sa trapiko panahon sa ting-uwan.
“Top #1 priority. Personnel safety and protection. Hoping to get more of these high visibility rain gears for our hardworking CCTO field traffic managers. We will start with the first 50 pairs (jacket and pants) next week,” matod sa post ni Holganza sa iyang Facebook account.
Apan gipadayag ni Holganza nga 50 ra ka paresan ang maangkon sa CCTO nga langkuban sa jacket ug pants aron dili sila mabasa.
Niini wala nay rason kon nganong manago ang mga enforcer panahon sa ting-uwan.
Ang dominanteng color nga yellow ug adunay gamay nga itom ug reflector maoy umaabot nga high visibility clothing sa CCTO nga susama sa gisul-ob sa mga traffic enforcer nga nadestino sa New York City sa Amerika.
“Akong personal donation ang 50 pairs. Hoping makita ug magustuhan sa city officials unya mopalit sila sama niini. Dili man nako kaya hatagan tanan,” dugang ni Holganza.
Ang chairman sa CCTO Board nagkanayon nga dako og ikatabang ang sapot sanglit dili na mabalda sa uwan ang mga enforcer ug magpadayon sa pagdumala sa trapiko sa higayon nga makabaton na sila niini.
Sa pagkakaron, pipila pa lang ka mga personnel sa CCTO ang adunay rain gears nga hinatag ni Holganza.