Garcia: Laman at Daya o ing Kaladwa? (Flesh and Blood or the Soul)

“Ngeni sasabyan ku ini, kanakung kapatad a lalaki at babai,

a ing laman at daya e da amana ing kayaryan ning Dyos;

o agya man ing masisira e na naman amana ing e masisira.”

~ Mumunang Aklat ding Korintu ¦Dangka 15: Sunis 50

(1 Corinthans 15:50)

“Inya sa’t e ta’sana mangayna lub,

agya mang king lwal masisira tamu,

dapot kilub mibabayu tamu aldo’ldo.

Uling ding mayan at pangpenandit a gulu

makapagkalub la para kekaming alang anggang ligaya

a makadaig bina kareti ngan.

Inya titingid mi la ring kekaming mata

e king akakit, nung e king e akakit,

Uling ing mayayakit pangsaguli,

dapot ing e akakit pang-alang-angga.”

~Kadwang Aklat ding Korintu ¦Dangka 4: Sunis 16-18

(2 Corinthians 4: 16-17)

“Uling balu mi a nung ing makalabwad

ming kubul masira ya,

atin kaming gusaling ibat king Dyos,

metung a alang-anggang bale king banwa,

samantala, daralung kami, manayang mipiblasan

kayalili ning maka-banwang tuknangan,

uling makapiblas kami e ke mayakit lubas.

Pauli ning kabang ati kami king kubul ayni,

daralung kami’t kababayatnan,

uling e mi buring malubas kami

dapot mipiblasan wala

king kekaming maka-banwang tuknangan,

bang ing mamamate malyari yang iyakmul ning bye.

Ngeni ing metung a miyalkus kekami

para king sangkan ayni ya pin ing Dyos,

a migkalub kekami king Diwa anting panigu,

gagawan nang bitasa nung sanu ing daratang.

Inya sa’t manalig kami at balu ming kabang ati ke

king pibale-bale king katawan makalaut kami king Ginu.

Uling maibye kami kapamilatan ning kasalpantayanan

e king panakit.

Manalig kami, ngaku, at pilinan ming makarayu king katawan.”

~Kadwang Aklat ding Korintu ¦Dangka 5: Sunis 1-8

( 2 Corinthians 5: 1-8)

“Ing laman mibait king laman, dapot ing diwa mibait ya king Diwa.”

~ Wan ¦Dangka 3: Sunis 6

(John 3:6)

“Karing magpumilit king pamanyapat mayap, magdulap ligaya,

dangalan at kelang-kamatayan, ipagkalub Na ing bye alang-angga.”

~ Ding Romanu ¦Dangka 2: Sunis 7

(Romans 2:7)

Mekibat Ya i Yeswa, "Mipagkalam ka, Simun anak nang Yonas!

Uling e mibulalag ini keka kapamilatan ning laman at daya,

dapot ning Kanakung Ibpa a ti king banwa.”

~ Mateu ¦Dangka 16: Sunis 17

(Matthew 16:17)

“Para king kaladwa alang beytan o kamatayan.

E ya naman maluluma, o mababating kapilan man.

E ya mibabait, alang-angga ya, alang patugut mandatila,

e ya mamamate at ya ing minunang dili.

E ya mamamate nung ing katawan paten ya.

O Prita, makananung ing tau a balu nang ing kaladwa

e ya asisira, e mibabait, alang-angga, e apapataimik,

makapate o apapate ne ing ninu man?

Nung makananu yang manaliling bayung imalan,

tatabili na la ring luma, makanyan mu naman,

ing kaladwa tatanggap yang makayatung katawan,

tatabili na la ring luma at ding e na malyari.

Ing kaladwa e ya malyaring pamututan

ning nanu mang sandata, e ya naman asilab ning api,

e na abasa ning danum, e na apabayutuk ning angin.

Ing metung a kaladwa e ya apapakli at e alalaso,

e ya asilab o apalangi mu naman.

Ala yang angga, laganas ya nu man karin, e ya ayayalilan,

e ya akimut, at ya naman kapilan man.

Mesabing ing kaladwa e ya mayayakit,

e ya adadalumat, e ya apapataimik, at e ya ayayalilan.

Neng balu mu ini,e ka sukat lungkut para king katawan.

Nung, sakali, isipan mu a ing kaladwa

mibabait yang alang patugut at parati yang mamamate,

makanyan pa man ala kang sangkan a malugma,

O masikanan takde.

Uling ninu man a mibait, bitasa ya ing kamatayan,

at para king ninu mang mete, ing kebaytan bitasa ya.

Inya sa’t king e apangilagan a pamanupad king tungkulan mu,

E ka sukat maglugma.

Ding sablang mabibye e la makalto king kamumulan da,

makalto la king kasalungsungang kabilyan,

at e na la na naman makalto pasibayu ampat malaso la.

Inya nanu para nanu ing pamanagulele.

Ding mapilan akakit de ing kaladwa anting makapagmulala,

ding aliwa awsan deng makapagmulala, ding aliwa

darandaman dang makapagmulala ya, kabang ding aliwa,

agyang kaybat da nang mekarandam dikil kaya,

e de asanak talaga.

O sapni nang Barat, ing manuknangan king katawan

ala yang angga at e ya apapate.

Inya pin e ka dapat paylungkut kaninumang lelangan.”

~ Dalit ning Kakataskatasang Panginwan ¦Dangka 2, Sunis 20- 30

(The Song of God 2:20-27)

***

Milabas na naman Daun. Uren na naman—migpalage no namang “makatakut” keng TV at sine, at pati na kareng social media! Para kareng keraklan, ing Daun kanu dikil ya king kamatayan at karing mengamate.

Aldo da ring mete kanu. Ding mengamate para karela ila ding kaladwa agpang karing sasabyan da ring talapamasyag at deng kaladwa para karela makatakut la! Bakit? Uling mete na la kanu at deting kaladwang deti makatakut la uling e da balu nung sanu karing katawan at kaladwa ing mamamate—at ala lang masabal nung nanu ing katutwan agya mang karing Banal a Kasulatan makapasyag ing katutwan kanita pang minunang panaun.

Atin lang maragul a pamiyaliwa ding katawan at kaladwa. Ing katawan ibat ya king labwad o lalang ya king labwad. Magmula king pungul magi yang bingut at daragul ya anting binatilyu o dalagita angga na king pangabaintau at angga na king pangadalaga.

Kaybat nita “daragdag” ya nung magkyasawa ya uling mikasupling ya naman. Kalabas ning panaun—tumwa ya. Mina ya’t mikasakit a maging sangkan ning pangamate na.

Ing kaladwa ibat ya at kasamak ne ning Apung Ginu manibat king ibat. Alang kabud mu makapakawani king kaladwa at king Pigmulan na—ing Dyos. Nung mikawani ya ma’t mipalaut Kaya ita pauli ning kapagnasan na at e pauli ning kapagnasan ning Ginu bista ma’t Yang mamye upaya bang agawa na iti ning kaladwa. Dapot e alang-angga. Datang ing panaun a dinan ne pa mu ring pamikatagun ning Ginu uling alang angga ing pakalulu at lugud na.

Maragul ya pamiyaliwa king pangsaguling katawan o laman king alang-anggang kaladwa.

Ika, itamu ing alang-anggang kaladwa, aliwa ing pangsaguling katawan.

***

Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king garciakragi@yahoo.com/ mag-text o maus para karing kutang o munikala: 0942-3924-399 o 0945-3795-270.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph