COTABATO CITY -- Gisusi ni Presidente Ferdinand Marcos Jr. ang epekto tropical storm "Paeng" sa Bangsamoro Autonomous Region in Muslim Mindanao (Barmm).
Nanguna ang Presidente sa usa ka situation briefing sa Datu Odin Sinsuat, Maguindanao del Norte kagahapon, Martes, Nobyembre 1.
Una nang nagpahigayon og aireal survey ang Presidente sa mga dapit nga grabeng giigo sa Bagyong Paeng sa Central Mindanao.
Base sa mga taho nga gipagawas sa Barmm’s Rapid Emergency Action on Disaster Incidence (READi), kapin sa 500,000 ka indibiduwal gikan sa 442 ka barangay ang naapektuhan, hinungdan nga ang Bangsamoro government nagdeklara og state of calamity sa tibuok rehiyon.
Atol sa pulong sa Presidente, uban sa National Disaster Risk Reduction and Management Council (NDRRMC), niadtong hinapos sa semana, si Marcos Jr. nagpahayag og mga kabalaka sa dakong pagbaha ug pagdahili sa yuta sa BARMM.
Gimandoan niya ang mga ahensiya sa nasudnong gobyerno sa paghatag og hingpit nga tabang ug pagpadali sa search, rescue ug relief operations aron matabangan ang liboan ka mga apektadong Pilipino sa rehiyon.
Dungan sa pagbisita sa Presidente, nahiabot sab ang dugang hinabang gikan sa Department of Social Welfare and Development (DSWD) sa kaulohan alang sa mga pamilya nga grabeng naapektuhan sa baha ug landslide sa Maguindanao del Norte, Maguindanao del Sur, North Cotabato ug Sultan Kudarat.
Gipatutukan sab ni Marcos Jr. ang mga samaron nga anaa sa balay tambalanan nga naluwas sa baha ug pagdahili sa yuta.