Gianunsyo sa Brooklyn Nets nga ilang gitaktak isip head coach si Steve Nash pipila ka mga oras una sila nasugamak sa kapildihan batok sa Chicago Bulls, 108-99, kagahapon, Nobiyembre 2, 2022 (PH time) sa National Basketball Association (NBA).
Nagkanayon si general manager Sean Marks nga nagkasinabot sila ni Nash nga panahon na nga adunay kausaban silang himuon human sa kaguliyang nga naagian sa Nets gikan pa sa miaging season hangtod ning sayong bahin sa bag-ong season.
“We both felt this was time,” batbat ni Marks. “It was certainly trending that way and to be quite frank the team was not doing what it was supposed to be doing.”
Nagkanayon si Marks nga wala na nila gikonsulta ang mga magduduwa kabahin sa ilang desisyon apan matod ni All-Star forward Kevin Durant, dili na kini kinahanglan.
Gipasabot ni Durant nga nasayod sila sa ilang sitwasyon ug dili na ikasurpresa ang pagkalagpot ni Nash.
“Let’s be real. We’re pros, we’re veterans,” batbat ni Durant. “We had a tough start. It was a rocky year last year, rocky summer. We knew that everybody was being evaluated. That’s just how it is in the league.”
Human sila gisungag sa Bulls, ang Nets nahagbong sa 2-6 nga rekord.
Gimugna ni Zach LaVine sa 4th quarter ang 20 sa iyang kinatibuk-ang 29 puntos aron pangulohan ang kadaugan sa Bulls, nga ningsaka sa 4-4 nga rekord.
Nidugang og 20 puntos si DeMar DeRozan samtang niamot og 17 puntos si Ayo Dosunmu alang sa Bulls.
Ang Nets gipangulohan ni Durant pinaagi sa iyang 32 puntos samtang nihatag og 20 puntos si Royce O’Neale.
Ang usa sa mga sinaligan sa Nets nga si Kyrie Irving igo lang nakamugna og upat ka mga puntos sa 2-of-12 shooting.
Wala siya’y napasulod sa tanan niyang unom ka mga itsa sa three-point land. (AP)