Ang mga lumolupyo nga nag-okupar sa Lot 937 sa Sitio San Miguel, Barangay Apas, dakbayan sa Sugbo wa makasukol ning higayona sa gimando sa korte nga demolisyon sa dul-an sa 200 ka mga balay sa Huwebes, Nobiymbre 3, 2022.
Kapin sa 300 ka police personnel ang ning-escort sa demolition team nga gisugat og inisyal nga pagsukol sa mga residente nga nagbutang og human barricade aron dili makasulod ang clearing crew sa lugar.
Niadtong Oktubre 13, ipatuman na unta ni Sheriff Edilberto Suarin ang demolition order apan ang mga opisyal sa City Hall pinangulohan ni Mayor Michael Rama nipatunga nga maoy hinungdan sa pagka-postpone niini.
Sa Huwebes, ang mga lumolupyo nagtan-aw na lang ug walay nahimo samtang ang ilang mga balay giguba sa demolition team.
Matod ni Suarin nga gihatagan og igong panahon ang mga residente sa pagbiya sa maong lugar sanglit ang writ of demolition unang gipagawas sa korte niadtong 2010.
Base sa writ of demolition, usa ka Mariano Godinez ang milihok isip reklamante o claimant sa 4.6 ka ektarya nga lote.
Si Anne Martel, usa sa mga homeowner officer, niingon nga ang sheriff wala mosubay sa tukmang proseso sa pagpatuman sa demolisyon.
Gihisgutan usab ni Martel nga walay gipahigayon nga pre-demolition conference nga nagdili sa mga ahensya sa gobyerno sa pagpahibawo sa mga residente sa mga serbisyo nga ilang mapahimuslan sa higayon nga mapahigayon na ang demolisyon.
Ang pag-apelar alang sa pag-isyu sa status quo ante-order naghulat usab sa Korte Suprema, matud ni Martel.
“Karon, asa naman ang rule of law? Kon ang rule of law atoang tumanon, pwede ipahuman sa mga na pending nga mga court motion nga gi-file sa homeowners association ug Solicitor General,” dugang ni Martel.
Si Manlalaban Collin Rosell, executive secretary ni Rama, nitug-an sa mga tigbalita nga dili na mahimong manginlabot ang City Government sa demolisyon sanglit temporary restraining order lang gikan sa korte ang makasuspenso sa kalihokan.
“Ang role sa city government is not really nga makisawsaw ta pag ayo sa kaso kon dili lang kinahanglan tabangan nimo ang homeless and underprivileged nga maklaro og asa sila og paingnan,” matud ni Rosell.
Dugang ni Rosell nga ang kagamhanan sa dakbayan mohatag og financial assistance nga labing menos P10,000 alang sa matag apektadong pamilya.
Si Teofilo Rosaroso Jr. sa Division for the Welfare of the Urban Poor sa dakbayan niingon nga adunay igong relocation sites sa dakbayan apan depende na kini sa apektadong mga pamilya kon mo-avail ba sila niini.
“Naa nay relocation, the city has 400 available relocation sites all over the city. Ang problema lang kay scattered ang mga housing sites,” matod ni Rosaroso.
Pipila sa mga residente dili mo-avail sa mga relocation site tungod kay gamay ra sila o layo kaayo sa ilang trabahoan, dugang niya.
Dugang pa ni Rosaroso nga ang medium-rise nga edipisyo sa Barangay Lorega-San Miguel mahimong magamit nga temporaryo nga housing unit sa pipila ka mga apektadong pamilya.
Ang Kagamhanan sa Dakbayan mo-apod-apod usab og food packs ngadto sa mga residente pinaagi sa Department of Social Welfare and Services sa dakbayan, matud niya.
