MOKABAT sa 16 ka toneldang basura ang nahipos sa Cebu Environmental Sanitation and Enhancement Team (Ceset) sa Nobiyembre 1 ug 2, 2022.
Si Grace Luardo, pangu sa Ceset, nipahibawo sa Superbalita Cebu sa Huwebes sa buntag, Nobiyembre 3, nga 10 ka toneladang basura ang ilang nakuha sa Nobiyembre 1 gikan sa mga sam-ang sa dakbayan.
Sa Nobiyembre 2, gamay na lang kay naa lang kini sa 6.6 tonelada tungod usab kay menos na ang mga tawo nga nanuaw sa mga sementeryo tungod sa kataas sa bakasyon.
Dunay ubang mga tawo nga sa Dominggo, Oktubre 30, pa lang, nanuaw na sa mga lubnganan sa ilang mga minahal.
Matod ni Luardo nga ang mga sementeryo nga ilang gihakutan og basura naglakip sa Chinese/Ludo Cemetery, Doña Pepang, Calamba, Carreta, Pardo, Luz, Veteran’s Cemetery ug Talamban.
Gagmay ra nga basura ang ilang nakuha sa mga sementeryo sa bukid. (REV)