DAVAO DE ORO -

DAKO ang pagtuo sa 24-anyos nga inahan nga giluwas sa saag nga iring ang kinabuhi sa 3-anyos niya nga anak human nakalingkawas sa grabeng sakit sulod sa balay tambalanan.

Kini ang gipahayag ni Madelyn (bansagon wa gibutyag), kinsa giingon nga human naayo sa sakit ang iyang anak, namatay sab ang binuhi nila nga iring.

Pagtuo ni Madelyn nga ang namatay nga iring mao ang misalo sa sakit sa iyang anak hinungdan nga namaayo kini apan ang iring mao sab ang namatay.

Gisaysay sa inahan nga usa ka bulan pa lang dihang miabot sa ilang pamilya ang maong iring nga wa sila masayod kon asa gikan, hinungdan nga ila kining gipanganlan og "Saag".

Matud pa nga lambingon ang iring, hinungdan nga dali ra kining nahiduol kanila ug hangtud nga miabot ang higayon nga nagkasakit ang anak ni Madelyn.

Giingon nga taliwa sa gibating pag-antos sa bata, nagluya sab ang iring hangtud nga namatay kini ug ang anak ni Madelyn inanay nga naulian sa sakit hangtud hingpit nga namaayo.

Giila nga kabayanihan nga gihimo sa iring nga gituohang nagsakripisyo hinungdan nga gihatagan kini og maayong lubong sa pamilya.