Way perpektong kaminyuon. Daghan nakong mga kaila nga bongga ang selebrasyon pagkasal apan wa magdugay.

Akong gipangutana akong mga kaila nga hangtod, dukot pa gihapon sa ilang kaminyuon.

Sekrito numero 1 ang pagdawat sa kamatuoran nga ang atong mga pares dunay ila sang mga kakuwang o weaknesses kay sa tinuod lang ang Labaw nga Makagagahom ra may perpekto maong kon kanunay nimong tutukan ang kakuwanagn sa imong pares di na nuon nimo makuha ang iyang mga maayong hiyas, gawi ug tinaguang kusog.

Kita tanan dunay itom nga kagahapon o kaagi kay wa may bisag usa nato nga angel. Busa kon ugaling magminyo, ayaw na segiha og balikbalik ug lugitlugita ang mga nangaging kasinatian labi na kon bati o sakit. Ang importante nga kamong duha ang karon. Angay na ilubong ang kagahapon kay di na man kini mabalik pa.

Move on! Sa English pa, forgive and forget. Kahibalo ko nga sayon kini litukon apan sarang lisuda buhaton labi na kon ang samad lawom ug dulot sa bukog. I-focus hinuon ninyong duha ang inyong mga damgo nga gustong makab-ot ug plano sa umaabot.

Kaluha sa kaminyuon ang problema unya way exempted ini kay ang kaminyuon di man ni katre nga puno sa humot nga rosas. Tanang mga milungtad nga kaminyuon nakasinati og kumbati sa mga pagsuway ug kalisdanan.

Kon kini moabot, ayaw pasagdi o biyai imong pares. Hinumdumi ang imong panumpa sa altar nga mag-uban mo sa kalisod, kalipay ug kasakit.

Ayaw sab ikumparar imong kaminyuon sa uban kay di man ni contest. Ang uban taas na og naabot unya duna say uban nga hangtod karon wa gihapon ka irog. Ayaw e-stress imong kaugalingon sa pagtandi. Hinuon, pagtambayayong mong duha para inyong makab-ot ang inyong mga gipangmithi.

Batuki ang kaaway sa kaminyuon gikan sa tumang selos, gahi og ulo, kakuwang sa pagmahal ug atiman, tamaran, pagkabakakon, pagkagastador, bastos ug way respito.

‘It takes two to Tanggo’ unya imo ra ning makab-ot kon kamong duha magdungan og tikang inig sayaw.