Giingong hitman ug leader sa usa ka drug group sa dakbayan sa Sugbo, number 2 most wanted person usab sa tibuok rehiyon 7 nadakpan sa mga sakop sa Criminal Investigation and Detection Group Regional Field unit 7 sulod sa barko nga mobiyahe paingon sa Mindanao.

Ang akusado giingong padung mangompra og illegal drugs sa Mindanao dihang nasikop sulod sa M/V Filipinas Jagna nga wa pa nakalarga gikan sa Pier 1, dakbayan sa Sugbo.

Ang akusado nga gihulagway nga gikahadlukan sa ilang dapit mao si Argie Codera Abella, 37, taga sitio Tarcom, Upper Laguerta, Brgy. Busay, Cebu City.

Si Abella nalutsan og duha ka warrants of arrest sa kasong murder ug homicide tungod sa usa ka insidente niadtong 2019.

Ang warrant sa kasong murder giluwatan ni Branch 58 Judge Ma. Lynna Pacamalan Adviento sa Regional Trial Court (RTC) sa dakbayan sa Sugbo nga pinitsahan og Marso 10, 2022 nga walay piyansa nga gitugot ang korte.

Ang kasong homicide giluwatan ni Branch 5 Judge Ricky Jones Macabaya sa Regional Trial Court (RTC) Branch 5 nga dunay piyansa nga P120,000.

INFORMANT

Nakadawat og impormasyon ang CIDG pinaagi ni Police Lieutenant Colonel Randy Korret nga ang akusado nasigpatan sa pantalan nga nisakay sa barko paingon sa Mindanao.

Nakig-alayon dayon sila sa Cebu City Mobile Force Company sa Cebu City Police Office, Mabolo police station ug sa Cebu City Port Authority police uban sa Philippine Coast Guard.

Matod ni Police Colonel Peter Miguel Tagtag Jr., hepe sa CIDG-7, nga nagdala og laing ngalan ang akusado sa iyang pagsakay sa barko nga nakuha sa mga operatiba sa manifesto sa barko.

“Based doon sa evaluation ng mga intel natin at sa investigation, ito ay considered as top most wanted person in the region. Ngayon lang natsambahan. Actually pasaka na sa barko ito pero nahabol pa natin,” matod ni Tagtag.

Giingong sakop si Argie sa Abella criminal gang nga nalambigit sa gun running, robbery hold up ug illegal drug trade sa dakbayan sa Sugbo ug mga silingang siyudad ug lungsod sa probinsya sa Sugbo.

KRIMEN

Niadtong Hunyo 23, 2019 sa ala 1:25 sa hapon, dunay away nga niresulta sa pagpamusil sa sitio Laguerta Tarcom, Brgy. Busay.

Sa imbestigasyon sa Mabolo Police Station, nitumaw nga gikaaway sa grupo ni Argie si Ernesto Salvador Pohinio, 32, iyang silingan.

Apan miabot ang laing biktima nga si Juniel Layla Codera, 28, higala ni Pohinio ug kabanay ni Argie aron mouwang sa away.

Usa sa mga suspek nga si Junard Llamado, 44, nikuha og armas ug nipusil kang Pohinio makatulo ka higayon.

Dali usab nga giilog ni Argie ang armas ug gisunod sa pagpusil si Codera maka tulo ka higayon.

Gidali pagdala sa Vicente Sotto Memorial Medical Center ang duha ka mga biktima apan patay nang nangabot.

Sa maong insidente lima ang gipasakaan og kasong murder sa korte ni Police Major Francis Renz Talosig nga mao silang Junard Llamado, Argie, ug duha ka igsuon niini nga silang Arnel ug Teldo ug Rotchel Daan.

Giila ang lima nga mga sakop sa Abella criminal gang nga nagtago sa Tarcom ug giingong gikahadlokan sila sa mga tawo sa dapit.

Sila usab ang gituohang responsable sa pagpusil sa usa ka babaye nga nasaypang asset sa Mabolo police station pipila ka tuig na ang milabay.

Ang hepe sa kapulisan sa dakbayan sa Sugbo Police Colonel Ireneo Dalogdog nagtuo nga sa pagkasikop ni Argie daghang mga kaso sa pagpatay sa dakbayan sa Sugbo ang masulbad.