Taas-taas pa man tuod ang latason, apan daw og sa dunay nakaapekto sa dagan sa kampanya sa pipila ka mga teams sa nagpadayon nga NBA 2022-23 season.
Daghan ang nakaobserbar nga sagad sa mga gilantaw nga inilog o title-contender (dili hinuon tanan) morag way gana modaog.
Dunay mga pangagpas nga posibling tuyo ning maong mga teams nga mangiwit sa overall standings sa pagkapupos sa regular season aron makaapil sa NBA Draft lottery sa 2023.
Nabantayan man gud nga gawas nga mga batan-on, abunda sa mga talents ang mosalmot sa NBA Draft sunod tuig ilabi na niining usa ka French national nga si Victor Wembanyama ug si Scott Henderson nga mao karon ang nasentro sa atraksiyon.
Ubos sa lagda sa NBA Draft, ang top four picks ipaagi sa lottery/drawing of lots sa upat ka teams nga adunay pinakabati og record sa miaging season.
So, kon masulod ka sa upat, natural nga duna kay chance nga makakuha ni Wembanyama o ni Henderson.
Kini si Wembanyana gihulagway ni LeBron James nga morag taga laing planeta.
“Everybody’s been a unicorn over the last few years, but he’s more like an alien. No one has ever seen anyone as tall but as fluid & graceful on the floor as he is... He’s for sure a generational talent,” ni James pa.
Kon ang kasaysayan sa NBA Draft ang hisgutan, labing siguro siya maoy pinakamaayong draftee sa mga bigmen.
Ang inila ug respetadong sports analyst sa Estados Unidos nga si Adrian Wojnarowski sa ESPN nihulagway kaniya nga “the greatest prospect in the NBA history.”
Tiaw mo bay sa iyang gitas-on nga 7-3 nga may gibug-aton nga 229 lbs., ang dinuwaan power-forward nga mangitsahay sab.
Makamaong mo-dribble, kon distansiyaan moitsa og tres, maayong moduwa og low post unya sa depensa nag-average og lima ka blocks matag duwa.
Kinsa man nga team nga dili maglaway ana. Wa sab ni siyay problema sa attitude.
Samtang kini si Henderson, sama kang Wembanyana 18-anyos, duna lay gitas-on nga 6-2 pero ang abilidad ikatandi sab sa lihok ni Ja Morant sa Grizzlies Memphis.
Sa G-League Ignite, nga kon wa ko masayop mao usab ang team ni Kai Sotto kaniadto, nag-average ni siya og 14.7 puntos, 4.9 assists ug 4.7 rebounds.
Gani sa usa ka exhibition game nagkakontra sila ni Wembanyana niadtong Oktobre ug didto nakita og maayo ang ilang tagsa-tagsa ka abilidad.
Sa maong duwa, si Wembanyana mitali og 37 puntos, pito niini gikan sa three-point area.
Kini si Wembanyana, mga atleta usab ang mga ginikanan niini.
Ang iyang amahan usa ka kanhi long jumper nga adunay gitas-on nga 6-6, ug ang iyang inahan nga 6-3 kanhi usab basketball player.
Tinuod nga way rookie nga makapa champion dayon, apan ang presensiya niini maoy makapalig-on ug makapahimong title contender sa team sa umaabot nga katuigan.
Sa NBA man gud, damgo sa matag team nga ma-champion kay dili man nila usikan ang oportunidad, sukwahi sa PBA nga makahibawo na ta kon asa paingon ang no. 1 pick sa drafting.