Kon nagtuo kang masulbad pa ning suliran sa trapiko sa Sugbo, ayaw na lang pag expect. Kon basehan ang nagkadaghan nga rehistrasyon sa mga sakyanan matag tuig, layo pa sa kasulbaran ang suliran sa huot nga trapiko.
Nakabantay ka ba nga dunay karsada nga gipalapdan ning pipila ka tuig nga nakalabay? Wala. Naa bay bag-ong mga karsada? Wala sab. Unsaon sa pagkasulbad sa paghuot sa mga sakyanan sa kadalanan? Mao na ang hinungdan nga sa rush hours, grabe ang kahuot sa trapiko.
Ang kahuot sa trapiko maoy hinungdan nga daghan usab nga mga pasahero ang dugay nga mangatanggong sa karsada tungod kay dugay makabalik ang mga sakyanang pasaheroan.
Kon kaniadto maka round trip og labing minos ka 10 ang PUJ, karon labing taas tingali naa lang sa pito.
Kaning trapiko karon wa ni kasulbran, ma-manage lang.
Busa kon naa ka lang sa unom ka kilometro ka layo gikan sa imong gitrabahoan, mas maayong magbiseklita ka, labina kon ang imong gitrabahoan dunay bike racks.
Wa man kinahanglana nga mahalon ang imong biseklita alang sa bike to work. Kana ganing surplus nga folding bike nga tag P5,000 igo na kaayo na. Niingon kong surplus kay sure kong lig-on kaayo ni tungod kay bisan made in China, ang standard niini Japanese.
MOTORSIKLO
Nanaghan ang mga motorsiklo kay sa mag bicycle to work tungod kay sa naay makina, magamit ni bisan asa ug mas paspas pa. Mahimo usab nga magamit sa pag sideline og habalhabal.
Nihit usab kaayo ang mga biseklita nga padata-datahan mao nang mas lisod ang pagpalit og bike kay sa magkuha og motorsiklo. Kinsa bay makapamasahero gamit ang biseklita?
Apan kon gusto kang mas makadaginot taliwa sa kamahal sa mga palaliton karon, mas maayo kon biseklita ang imong gamiton.
Di ka na kinahanglan pang mogasolina, labing minos kaduha, sa usa ka semana. Wa sab kay datahan sa biseklita kay mahimo ra lagi nga one time lang ang imong gasto, kana sa adlaw nimong pagpalit.
Di na lang nako balikbalikon ang health benefit sa pag bike.
MINDSET
Mahimo ug makaya ba gud ni? Kon gusto kang makadaginot sa mga galastuhan, kini dako kaayo og ikatabang. Kon gustuhon, mahimo kaayo. Mindset lang gyud na. Kon ganahan kaayo ka, mapangitaan ni og paagi.
Karon di ba ang minimum nga pletihan sa traditional nga PUJ naa sa 11? Kon motrabaho ka 26 ka adlaw matag buwan, mogasto ka og P286 kada buwan kun P3,432 kada tuig.
Daghan ka na og mapalit niini sa Pasko o sa Bag-ong Tuig o makasugod na ka og gamay nga negusyo.
Karong panahuna nga grabe ang kahimtang sa ekonomiya sa kalibutan, mas maayo ang pagdaginot sa galastuhan. Dako kaayo og ikatabang niini ang biseklita sa gasto sa pletihan ug paglikay nga ma-late sa trabaho.
Ang imo lang usbon mao ang mindset. Huna-hunaon nimo og maayo ang kaanindot sa epekto sa panglawas ug makadaginot ka pa sa pletihan sa PUJ.
Kana maoy imong hinuktokan og maayo.