NANGUNA ang Davao Region sa mga rehiyon sa Mindanao nga dunay pinakadaghang namatay tungod sa Covid-19 gikan Enero hangtud Hulyo 2022, base sa pinakaulahing taho sa Philippine Statistics Authority (PSA).
Ang rehiyon nitali og 587 nga patay atol sa maong panahon, nga naghimo niya nga ikaunom sa tibuok nasud apan nanguna sa mga rehiyon sa Mindanao.
Kini gisundan sa Northern Mindanao nga nakatala og 483 nga patay, Soccsksargen nga adunay 328, Zamboanga Peninsula nga adunay 268, Caraga nga adunay 252, ug ang Bangsamoro Autonomous Region in Muslim Mindanao nga dunay 32.
Ang nag-unang tulo sa tibuok nasud mao ang National Capital Region nga dunay 2,986 patay, Calabarzon nga adunay 1,856, ug Central Luzon nga adunay 1,573. Sa bahin sa mga siyudad, ang Quezon city maoy pinakadaghang ihap sa nangamatay nga dunay 623.
Base sa Covid-19 Tracker sa Department of Health nga sukad Nobyembre 5, ang rehiyon nakatala og 3,922 kinatibuk-ang patay sukad nagsugod ang pandemya, kadaghanan gikan sa Davao City, Davao del Norte ug Davao de Oro sa maong han-ay.
Samtang ang PSA nagtaho sab nga ang nanguna nga hinungdan sa pagkamatay sa nasud mao ang "ischaemic heart diseases, cerebrovascular diseases, and neoplasms or cancer".
Ang ischaemic heart diseases gilangkuban og 18.6 porsiyento sa kinatibuk-ang namatay gikan Enero hangtud Hulyo karong tuiga, samtang ang cerebrovascular diseases ug cancer gilangkuban sa 10.4 ug 10.1 porsiyento sa maong han-ay.
"Incidentally, these were also the leading causes of death in the same period in 2021," dugang pahayag sa PSA.