Nirehistro og makapaukyab nga 4th round technical knockout nga kadaugan si “Prince” Albert Pagara sa iyang pagbalik og away batok kang Allan Villanueva niadtong Sabado sa gabii, Nobiyembre 5, 2022, sa Talisay City Sports Complex.
Ang away nahilakip sa labing unang promosyon nga gibuhian sa bag-ong boxing stable sa Sugbo nga mao ang Prime Stags Sports (PSS).
Ang promosyon giulohan og Prime Fight One nga maoy labing unang edisyon sa Prime Fight Series nga gipasiugdahan sa PSS.
Taliwala sa taas nga panahon nga wala siya nipakita og aksyon, gipakita ni Pagara nga wala gihapon matay-i ang iyang abilidad.
Hinuon sa interbyu sa Sun.Star Cebu, igsuong buhatan ning mantalaan, nagkanayon si Pagara nga kinahanglan pa niyang magpaubos og timbang sa sunod niyang away.
Matod ni Pagara bug-at ra alang kaniya ang 140 pounds nga maoy giawayan nila ni Villanueva.
Si Pagara nisaka sa 34-1, 24KOs nga rekord samtang si Villnueva nahagbong sa 11-4, 8KOs nga baraha.
Sa laing bahin, nagkanayon ang usa sa mga tag-iya sa PSS nga si Jigo Dacua nga determinado ang ilang organisasyon nga buhion og balik ang boksing sa Sugbo nga tataw nga nahagba sa pagkasira sa ALA Promotions.
“Mao gyud na ang among ambisyon. Gusto namo nga makatabang og boxers hangtod nga mahimo silang champion,” matod ni Dacua.
Sa main event, niposte og unanimous decision nga kadaugan si Kit Ceron Garces batok kang Ian Donaire aron angkunon ang bakanteng World Boxing Federation (WBF) Australasian flyweight belt.
Si Garces, kinsa lumad nga taga Talisay City, nitumba ni Donaire sa 1st ug 3rd rounds.
Hinuon nakalahutay ra si Donaire ug nakatiwas sa away.
Si Garces nisaka sa 5-0, 4KOs nga rekord samtang si Donaire natagak sa 4-2-1, 3KOs.
Aduna pa’y ubay-ubay nga nasaksihan sa promosyon.