“Ing kalikasang pangkatawan makikilala
bilang miyayalilan alang kapupusan.
Ing sikluban ya pin ing pangsiklubang aske
ning Kakataskatasang Panginwan,
at Aku ing Panginwang itang mipapakilala
bilang Punkaladwa, makatuknang karing balang pusu
ding balang makikatawang mabibye.
At ninu man, king penandit ning kamatayan,
lakwan ne ing katawan na,
Aku mu ing agaganaka na kabud,
tambing nang tanggapan ing Kanakung kalikasan.
Kaniti alang pamikakunu.
Nanu mang kabilyang aganaka na ku ninu man
ampat lakwan ne ing katawan na,
ing kabilyang ita dasnan nang alang kabyus.”
~Dalit ning Kakataskatasang Panginwan
│Dangka 8: Sunis 4-6
(The Song of God 8:4-6)
“Pauli ning nung ninu mang agaganaka
na kung alang lisya, saguli kung akwa,
O anak nang Prita, uli ning alang patugut
nang pamisuglung king makatagulaling a kasuywan.
Kaybat da kung disnan, ding dakilang kaladwa,
a yogi king pamagdikil, e na la mibabalik pa
king pangsaguling labwad, a kisna king kasakitan,
uling disnan da na ing pekamatas a kapantasan.
Magmula king pekamatas a labwad
king makagabung karinan angga na
king pekamababa, laganas a sikluban
ning kasakitan nung nukarin ing paulit-ulit
a pamibait at pangamate magaganap.
Dapot ninu mang dasnan na ing karinan Ku,
O anak nang Kunti, e ne mibait pasibayu.”
~Dalit ning Kakataskatasang Panginwan
│Dangka 8: Sunis 14-16
(The Song of God 8:14-16)
***
Keraklan karing tau king milabas at lakwas na king kasalungsungan man dusuldit lang mantun paralan bang ligaya la. Likas mu ita dapot ing kutang tutu no man kayang liligaya karing kasangkapan bang ligaya la?
Nukarin wari manibatan ing tune ligaya? Keng pibandyan at salape? Keng legwan o sentingan? Keng upaya at sikanan? Keng bilang ding talatuke? Keng kasikatan at dangalan? Keting yato--o nukarin?
Mapilan a alimbawang tau a atin la ngan kareng mesambitla a dapat meligaya na la king kabilyan da king bye ra—Elvis Presley, Michael Jackson at lalu na i Kurt Cobain. Ati na ngan karela ing pibandyan at salapi—mansion, dakal a mangamal a saken; masanting lang mesabi; mayupaya la at dakal la tawan at ing amanu dab ala utus a e apakli at dagdag la pa reng talatuki da (followers) at (paymate uli ning pangaburi da karelang matikdi o fans) mabilug a yatu uling sikat la at kisnang dangalan. Bala dyos na lang sasamban da keti king yatu!
Makanyan man, e la meging tune maligaya. Nanu-nanu ing daraptan da bang ligaya la—pamanyiping karing mangalagung babai, at misan pati na lalaki; pamaglakbe karing sablang mangasanting a bangsa mabilug a yatu; pamanyake karing mangamal a eroplanu, barkung maglayag king dagat ning mabilug a yatu at mangamal at top-class limousines; pamamangan at pamagpakabsing anggang batal inya paysuka la pa bang makapangan la pang agad pasibayu; pamaninum mangamal a alak at pati na bawal a panulu—dapot e la pa mu rin maligaya at kalubkuban la pa mu naman bye at pusu.
Nanu ing kulang karela? Ligayang tune a para king diwa, king tune sarili—ing kaladwang makatuknang king pangsaguli at makalabwad a katawan. Manibatan mu ita king Apung Ginu nung atin tamung pamisuglung Kaya—nung susuyu tamu kaya king sablang agyu tamu Kaya—malati man o maragul.
Tunggen la ng parati ding Nwan nang Lagyu ning Ginu bang parati ta’Yang aganaka at akasanayan iti, maging libutad na Ya ning bye tamu. Isuglung tamu ing sablang daraptan tamu gawan tamung anting daun tamu Kaya bang’ting upayang e ta’Ya akalingwan pena-penandit—lakwas na karing tawling penandit at inawa tamu.
E tamu sumala at e magkamali uling atin Yang tipan kekatamu at deti mesambitla la karing makapayunang sunis at ing Ginu e ya sasala karing at tutupad yang dalise karing tipan na kekatamu kapilan man.
Ganakan ta’Ya parati ing Ginu. E ta’Ya kakalingwan ing Ginu!
***
Masayang Aldobeytan king kekaming bungsung bingut—Gabrielle Garcia-Caylao!
Sana mandatila kang maganaka, malambis, byasa at mapagdulap king katutwan lakwas na karing dikil king Apung Ginu at ding paralan nung makananu ing makatagulaling a kasuywan Kaya.
***
Dake Talabaldugan:
1. milusung² (pangdiwa) mekayalug o mekatalbug bitis pati na katawan king danum. English – was able to submerge one’s feet or body into the flood or body of water. Alimbawa king pamangamit: “Kapaldan na keng malambat nang lagnat Duming—milusung ne ya mu rin keng ligawan bang makipanima.”
2. milut - (pangdiwa) makuyad a aske ning manilut o manulu kapamilatan ning aplus, apis o tagkil, igut o batak. English – someone to heal or cure sprained body part or parts or fractured bones or joints. Alimbawa king pamangamit: “Ing menilut keng kanakung kapatad ya mu namang pepadakit ku bang milut keng ank ding siping ming bale.”
***
MIKASING-KABALDUGANG at MISALUNGAT
KABALDUGANG AMANU TAMU
1.makuyad – kulang king sukad ning kaba o kekaban. E mipabut.
2.malapit – kalele, makalele mu, kasiping, salungat ning malaut o marayu.
3.kadangkal – malyaring sukaran keng tindaragul ila ning panuldung taliri.
4.kalakbang – malyaring dasnan o alipatan king metung mung takbang.
5.kasiping – mitatagkilan na balat at mipamau na banglu o buluk keng kalapit.
6.lele – malapit mu. Makapakat na alus.
7.atutan – salitang dalan a mangabaldugang asna kalapit inya malyaring abau mu ing inawa o nanu mang salingalngal a linwal king katawan ning ninu man.
8.kuto – kulang king sukad ning kaba. Mekad menibatan king Kastila o Kepampanganang Kastila yang amanu iti—ibat king amanung “corto”.
***
Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king garciakragi@yahoo.com/ mag-text o maus para karing kutang o munikala: 0942-3924-399 o 0945-3795-270.