Makasubo ang gidangatan ni Patrolman Edgardo Silva dihang nakit-an kini sa iyang kauban nga wa nay kinabuhi apan dunay samad sa tampihak sa ilang kampo sa Camp Ceperino Genovia nga nahimutang sa lungsod sa Sibonga, lalawigan sa Sugbo, isip sakop sa Regional Mobile Force Battalion (RMFB) 7 atol sa Adlaw sa mga Patay niadtong Nobiyembre 2.
Si Silva nakaplagan nga naghigda unya nagkupot sa iyang 9mm nga armas nga diha pa sa iyang dughan. Gikataho usab nga nakit-an ang pulis nga nagpusilpusil nga way bala sulod sa barracks sa kampo unya nakit-an sa mga kauban nga wa mahimutang nga nagsulod ug gawas sa barracks.
Padayon karon ang imbestigasyon sa mga awtoridad kon unsay hinungdan sa iyang kamatayon. Di masuta ang hinungdan kon di pa motapos ang pakisusi sa Scene of the Crime Operation (SOCO) sa kapulisan. Daghang mitumaw nga espekulasyon sa kamatayon ni Silva busa angay lang matino ang tinud-anay nga hinungdan niini.
Nakauyon ko sa mando ni Police Regional Office (PRO) 7 Director Roderick Augustus Alba ngadto sa hepe sa Regional Medical and Dental Unit Central nga susihon ang “psychological health and fitness” sa kapulisan. Mas pabor ko sa panawagan ni National Police Commission (Napolcom) 7 Officer-in-Charge Risty Sibay nga iestablisar ang mental health program sa Philippine National Police (PNP).
Mas maayo nga adunay mental health unit ang kapulisan diin sentro sa ilang gimbuhaton ang pagpatuman sa mental health program aron maabagan ning mga sakop sa kapulisan nga dunay gihambin nga nagkadaiyang problema nga gitago lang sa ilang kaugalingon. Mga tawo usab ni sila nga sama sa ilang giimbestigar nga mga krimen o mga nagkadaiyang mga kaso diin maapektuhan usab sila ilabi nga naa ang pressure sa trabaho.
Unsaon man nila sa pagtarong og serbisyo ug protehir kanato nga sila mismo adunay mga tinaguan nga problema? Mas maayo nga sa labing daling panahon maumol kini nga buhatan diin langkuban sa mga gradwado sa psychology o mga doctor nga eksperto nga molantaw sa mga panglihoklihok ug batasan sa usa ka tawo. (josephelvirtubilan@gmail.com)