PANGILKIL ang gilantaw nga hinungdan sa pagpamomba sa bus alas 11:25 sa buntag, Dominggo, Nobiyembre 6, 2022, sa Siyudad sa Tacurong.
Atol sa hitabo usa ka tawo ang namatay nga giilang si Gilbert Barbosa Panes, 56, minyo ug nagpuyo sa Carmen, Cotabato Province.
Samtang laing onse ka mga tawo ang naangol nga sila Erlinda Estiban Pama, 47, taga Tulunan; Braulio Boston, 39, taga M'lang; Delia Della, 64; Nancy Nietes, 41; Bea Posia, 21, taga Makilala; Rex Rezenelde, 29, taga Makilala; Emmanuel Latadaya, 22, taga Guihing, Davao del Sur; Zay Nietes, 5-anyos; Zezuel Ojorio, 26, taga Cotabato Province; Jobert Rivera, 25, taga Cotabato Province; ug Esmael Daomilang, 55, taga Barangay Poblacion, Buluan, Maguindanao nga pulos gipangdala sa Saint Louis Hospital sa Tacurong City.
Matud ni Tacurong City Chief of Police Lieutenant Colonel Joan Maganto, sakay ang mga biktima sa usa ka yunit sa Yellow Bus Line (YBL) nga dunay body number 2588 gikan sa siyudad sa Kidapawan.
Apan pag-abot sa YBL sa Purok Yellowbell, Barangay New Isabela, Tacurong City, nibuto ang bomba sa likod nga bahin sa bus.
Daling niabot ang kapulisan, sundalo ug rescue unit sa City Disaster Risk Reduction and Management (CDRRM) diin gidala ang mga biktima sa tambalanan apan nakabsan sa kinabuhi si Panes.
Gawas sa nibuto nga IED, nakuha usab sa Explosive Ordnance Disposal Team ang duha ka bomba sulod sa bus nga wala pa mobuto.
Kahinumdoman nga sagad biktima sa pagpamomba ang YBL units ug ang Alkhobar Terror Group o Bangsamoro Islamic Freedom Fighters (BIFF) maoy gitumbok nga suspek tungod sa pagpangilkil.
Hugot nga gikondena ni Tacurong City Mayor Joseph George Lechonsito ug ni Governor Emmylou "Lala" Mendoza ang pagpamomba kon diin kasagaran sa mga biktima taga Cotabato Province.
Padayon pa ang imbestigasyon sa Tacurong City PNP sa pakigtambayayong sa militar aron nga matumbok ang mga suspek.