Tanang job order (JO) nga trabahante sa Cebu City Hall nga ning-apelar alang sa renewal sa ilang kontrata sa pagpanarbaho nga ni-expire niadtong Septiyembre 30, 2022, gikonsiderar nga rehired ni Mayor Michael Rama.
Sa pakighinabi sa mga tigbalita sa Lunes, Nob. 7, 2022, si Rama niingon nga kapin sa 400 ka job orders (JO) ug mga kaswal nga empleyado ang nahatagan og bag-ong kontrata sugod niadtong Oktubre 1.
“After due deliberation and all circumstances considered, I exercised the mayor’s prerogative. (They are) rehired then they will continuously be (evaluated),” matod ni Rama.
Dugang pa sa mayor nga nagsugod na ang hiring ug evaluation process sa mga empleyado alang sa Enero 2023.
Atol sa Panaghisgot Forum nga gipasiugdahan sa Public Information Office niadtong Lunes, si Remie Vestil Mondigo, pangulo sa Human Resource and Development Office sa dakbayan, niingon nga mokabat sa 660 ka mga empleyado ang niapelar alang sa renewal sa ilang mga kontrata sa trabaho.
Dugang ni Mondigo nga ila nang giproseso ang appointment papers sa pipila ka mga empleyado nga na-renew kaniadto sa wala pa ang pronouncement ni Rama niadtong Lunes.
Sa sunodsunod nga pag-apelar nga gihimo sa mga empleyado, ang kinatibuk-ang ihap sa mga trabahante nga gihatagan og bag-ong mga kontrata niabot na sa dul-an sa 1,000, matud ni Mondigo.
Gipresentar usab niya ang gidaghanon sa manpower nga gigamit sa City Hall sukad niadtong 1988.
Niadtong 1988, sa dihang si Tomas Osmeña pa ang mayor, ang City Hall aduna lay 3,189 ka kinatibuk-ang ihap sa mga empleyado nga casual, permanente, coterminous, ug contractual.
Ang City Government wala usab nag-hire og bisan kinsa nga JO nga mga empleyado sukad niadtong 1988 ug nagsugod lamang sa pag-hire niadtong 2019.
Ang presentasyon ni Mondigo nagpakita nga ang Siyudad adunay kinatibuk-an nga 4,253 ka mga empleyado niadtong 2018 apan nidako kini ngadto sa 7,210 niadtong 2019 tungod sa 2,251 ka JOs nga nanarbaho.
Iyang gipasabot nga pipila niini nga mga JO nadestino sa lainlaing mga barangay ug ubang mga departamento sa City Hall nga nagkinahanglan og dugang manpower.
Ang gidaghanon sa mga JO misaka sa mosunod nga mga tuig diin ang kinadak-ang ihap makita sa 2021, diin ang Siyudad nag-hire og 5,075 ka JOs nga nagdala sa kinatibuk-ang ihap sa mga empleyado ngadto sa 10,183.
Sa Septiyembre 30, 2022, ang City Hall adunay 3,433 ka kaswal nga empleyado, 1,367 ka permanenteng empleyado, 200 ka coterminous employees, 45 ka contractual workers, ug 2,263 ka JOs, nga ang tanan moabot og 7,363 ka mga empleyado.
Matod ni Mondigo nga mikunhod ang gidaghanon sa mga JO nga kasamtangang nagtrabaho sa Siyudad tungod kay wala na gipadayon sa Siyudad ang pipila ka pandemic-response programs.
Si manlalaban Collin Rosell, executive secretary ni Rama, niingon nga gusto sa mayor nga ipatuman ang rightsizing sa mga empleyado sa City Hall aron makadaginot og pundo nga magamit sa lainlaing mga programa ug proyekto sa dakbayan.
“Kon maka spare sad ta niining mga resources, mas daghan ug dako ang maabot ngadto sa mga tawo nga nanginahanglan. Ingon ana ang kanindot kon naa tay klaro kon pila ra gyud ang gikinahanglan aron ma converted into programs and projects atoang resources,” matod ni Rosell. (IRT)