Uban sa hingpit nga pagpatuman sa face-to-face nga mga klase sa tanang publikong tunghaan, gipakusog usab sa Cebu City Government ang pagpabakuna sa mga tinun-an.
Gipangulohan ni Mayor Michael Rama ang grand launching sa “Balik Eskwela Pabakuna Ta Extrabonanza” sa Tisa II Elementary School sa Barangay Tisa Lunes, Nobiyembre 7, 2022.
Base sa datos nga gipresentar, adunay kinatibuk-an nga 217,198 ka mga estudyante nga na-enrol sa tanan nga mga pampublikong eskwelahan sa siyudad apan 103,675 lamang ka mga estudyante ang hingpit nga nabakunahan batok sa coronavirus disease 2019 (Covid-19).
Aron madasig ang mga bata nga magpabakuna, ang Kagamhanan sa Dakbayan uban sa pribadong mga sponsor mohatag og dagkong premyo atol sa grand raffle promo karong Pebrero 2023.
Ang mga premyo naglakip sa duha ka condominium units, usa ka sakyanan, walo ka motorsiklo, 15 ka laptop, 10 ka refrigerator, 20 ka tablet computer, ug uban pa.
Matod ni Rama nga aron maprotektahan ang pribasiya sa mga bata, ang raffle salmotan sa ilang mga ginikanan.
Matod ni Rama, kinahanglang “complete the cycle” pinaagi sa pagsiguro nga ang tanang lungsuranon, lakip ang mga estudyante mabakunahan batok sa virus.
“We have to complete the cycle. We are already declaring freedom, shared responsibility... nangabli nata sa skwelahan, kinahanglan atoang tiwason tanan kini,” matod ni Rama.
NAGDUHA-DUHA
Sa laing pakighinabi, gidasig ni Cebu City Health Department head Dr. Daisy Villa ang mga ginikanan niadtong wala pa nabakunahan nga mga estudyante nga protektahan ang ilang mga anak batok sa Covid-19 virus pinaagi sa mga bakuna.
Matod ni Villa nga adunay mga bata nga gustong magpabakuna apan dili makahimo sanglit nagduha-duha pa ang ilang mga ginikanan sa mga bakuna.
“Kon imong tan-awon, ang mga bata kay ganahan magpa bakuna pero ang ilang ginikanan dili pa mosugot kay tungod kay nahadlok kon unsa man gani ang dangatan sa ilahang mga anak,” ni Villa.
Gipasalig ni Villa sa mga ginikanan nga adunay mga medical personnel nga ipakatap sa lainlaing mga vaccination site aron masiguro nga ang saktong health screening himuon sa dili pa ang aktuwal nga pagbakuna.
Ang mga rekisitos sa pagpabakuna sa pedia sama sa birth certificates dili na kinahanglan nga ipresentar basta ang ginikanan anaa lamang sa pagtestigo sa pagkatawo sa ilang mga anak.
“Tanang ginikanan dili makakuha ana (birth certificate), hasol kaayo unya mogasto pa. Karon kahibaw gyud ta nga menos kaayo ang atoang pangwarta... atoa pa gyud lisod-lisoron pagkuha ana,” matod ni Villa.
Human sa grand launching niadtong Lunes, ang CHD ug local school board mobisita ug mopahigayon og vaccination sa lain-laing mga pampublikong tunghaan sa dakbayan. (IRT)