Mga duwa karon: Nobiyembre 8, 2022
5:15 pm- USC batok CIT-U (High School)
6:45 pm- USC batok UV (College)
Sumpayan og suway sa University of the Visayas (UV) Green Lancers ang sunodsunod nilang kadaugan sa ilang pagpakigsangka og balik sa University of San Carlos (USC) Warriors sa main game karong gabii, Nobiyembre 8, 2022, sa Cebu Schools Athletic Foundation Inc. (CESAFI) basketball college division sa Cebu Coliseum.
Ang Green Lancers ni coach Gary Cortes kasamtangang nag-inusara sa ibabaw nga bahin dala ang 5-0 nga rekord.
Sa premirong engkuwentro sa duha ka mga kampo niadtong Oktubre 16, 2022, ningdominar ang Green Lancers sa tanang departamento aron irehistro ang 91-64 nga kadaugan.
Basi niini, dili ikalimod nga grabe ka inilog ang Green Lancers.
Hinuon, gilauman nga mas mokombati og maayo ang Warriors hilabi na kay nagkinahanglan silang makadugang og kadaugan aron makakumpayot og puwesto sa top four.
Ang Warriors kasamtangang nakigbahin sa University of San Jose Recoletos (USJ-R) Jaguars sa ikaupat nga puwesto dala ang 2-4 nga rekord.
Sa high school division, magsangka ang USC Warriors ug Cebu Institute of Technology-University (CITU) Wildkittens sa premirong duwa.
Ang Baby Warriors wala pa’y daog sulod sa upat ka mga duwa samtang ang Wildkittens naggunit og 2-2 nga rekord. (ESL)