Gipakgang sa host Atlanta Hawks ang kainit sa Milwaukee Bucks pinaagi sa pagrehistro og 117-98 nga kadaugan kagahapon, Nobiyembre 8, 2022 (PH time) sa National Basketball Association (NBA).
Ang Hawks mao ang nakaputol sa siyam ka sunodsunod nga kadaugan sa Bucks gikan sa pagsugod sa season ug ilaha kining nahimo bisan wala ang ilang sinaligang pointguard nga si All-Star Trae Young.
Sa pagpadaplin ni Young, kinsa adunay angol sa iyang wa nga tiil, gisawo ni Dejounte Murray ang obligasyon isip starting pointguard ug nimugna kini og 25 puntos aron pangulohan ang kadaugan.
Kuyaw sab nga nakaduwa ang rookie nga si A.J. Griffin ug nidugang kini og career-high nga 24 puntos alang sa Hawks, nga ningsaka sa 7-3 nga rekord.
“We got more aggressive in the third and fourth quarter and were able to beat the best team in the league tonight,” matod ni Hawks coach Nate McMillan. “Offensively, I thought we had really good movement, made them work and were patient and we didn’t settle for the quick shots like we did in the first game against them.”
Si Giannis Antetokounmpo, kinsa nibalik gikan sa usa ka duwa nga pagpalta, nimugna og 25 puntos aron pangulohan ang Bucks, nga maoy katapusang team nga nakatilaw og pilde sa season.
Nidugang og 16 puntos si Jrue Holiday alang sa Bucks samtang ningtampo og 11 puntos matag usa sila si Bobby Portis, Grayson Allen ug Brook Lopez.
Ang Bucks nakahimo og season-high 19 ka turnovers nga maoy tataw nga hinungdan sa ilang kapildihan.
Kanunay untang naglabaw ang Bucks sa 1st half apan ningkapakapa og sugod sa 3rd quarter ang opensa sa Hawks aron usabon ang dagan sa estorya.
Gidominar sa Hawks ang Bucks sa hinakutay og puntos sa 3rd quarter, 37-22, aron kontrolahon og sugod ang duwa.
“They got the best of us tonight,” matod ni Bucks forward Bobby Portis. “They made shots and spread the basketball around. They had more energy than us tonight. It showed.” (AP)