GUSTO karon ni Davao City First Congressional District Representative Paolo Duterte nga ipabalhog sa prisohan ang mga "deadbeat" nga ginikanan nga nasuta nga tinuyo ug balik-balik nga nagpasagad sa ilang obligasyon sa paghatag og sustento sa bata.
Ubos sa Sugyot-Balaudnon nga House Bill (HB) No. 4807, iyang gisang-at uban sa laing tulo ka mga magbabalaod, diin gisugyot ni Duterte nga ang mga ginikanan nga adunay balik-balik nga mga kalapasan sa pagkapakyas sa pagpadala sa pinansiyal nga suporta ngadto sa ilang mga anak silotan og pagkabilanggo nga duha ngadto sa upat ka tuig, depende sa korte.
Kinahanglan usab nga pabayron sila og multa gikan sa P100,000 ngadto sa P300,000.
Ang unang higayon nga nakasala mahimong mahatagan og "probation under the measure".
Sa pagtan-aw nga kadaghanan sa mga nagpasagad nga mga ginikanan nga nagpugong sa suporta sa bata, kadtong mga lalaki, diin si Duterte miingon nga kini nga mga "deadbeat" nga mga amahan kinahanglan mahamtangan sa higpit nga mga silot kanila.
Gitataw usab niya nga ubos sa Republic Act (RA) 9262 o ang "Anti-Violence Against Women and Children Act," ang pagpugong sa sustento sa bata giklasipikar nga "economic abuse" ug gikonsiderar nga krimen
Ang kantidad sa sustento sa bata ubos sa HB 4807 dili moubos sa P6,000 kada buwan, balor sa P200 kada adlaw. Ang hiniusang binuwan nga net income sa duha ka ginikanan gamiton sa pagdeterminar sa kantidad sa sustento sa bata, nga bahinon sa proporsiyon tali sa duha, base sa ilang tagsa-tagsa ka net revenues.
Kauban ni Benguet Representative Eric Yap ug ACT-CIS Partylist Reps Edvic Yap ug Jeffrey Soriano, ang magbabalaod sa siyudad, mihangyo usab sa pagtukod og National Child Support Program (NCSP) ubos sa balaudnon aron makatabang sa pagpatuman sa child support claims, nga ilakip ang pagpangita sa mga ginikanan ug pagpadali sa pagkolekta sa tabang pinansiyal gikan kanila.
Ang NCSP misunod sa pagpatuman sa Expanded Solo Parents Act (RA 11861) ug makatabang sa pagpakunhod sa mga baradong docket sa korte sa mga kaso nga may kalabutan sa child support claims, ang mga awtor sa maong balaudnon.
Ipangalagad sa Department of Social Welfare and Development (DSWD), ang NCSP maoy gitahasan sa paghimo og Child Support Register o database sa child support claims ug mga kaso.
Ang DSWD gimandoan nga mangayo og tabang gikan sa ubang mga ahensiya aron mapanalipdan ang NCSP gikan sa pagpanglimbong ug pag-abuso, "lakip ang mga sumbanan ug pamaagi bahin sa nepotismo, panagbangi sa interes sa mga indibiduwal nga responsable sa pagdumala ug pagdumala sa programa, mga kickback, ug paggamit sa politikanhong patronage."
Sa pagkutlo sa bag-ohay nga pagtuon sa World Health Organization (WHO), si Duterte niingon nga dul-an sa 15 ka milyon nga mga Pilipino, kasagaran mga babaye, mga solo parents.
"Solo parents are already responsible for taking care of their kids independently. They should not be burdened with the problem of compelling their irresponsible and negligent ex-partners to pay child support," ingon ni Duterte.
Dugang niini, "This proposed law aims to ensure that their kids have sufficient support for their subsistence and other essential needs."
Gawas sa mga silot, ang balaudnon nag-ingon nga ang iresponsableng mga ginikanan nga mapakyas sa pagbayad sa suporta sa bata mapugos sa pagbuhat sama sa mosunod:
Pagpahamtang og "liens" sa ilang tinuod ug personal nga kabtangan sa kantidad nga tugbang sa overdue nga child support claims, pagpugong sa ilang tax refunds, pagtaho sa ilang pagpasagad ngadto sa mga consumer credit bureaus, ug pagsakmit o paglakip sa ilang bayad, settlement ug uban pang mga kabtangan nga gihuptan sa mga pinansiyal nga institusyon ug mga pundo sa pagretiro.
Ang mga ginikanan nga adunay mga bayad sa suporta sa bata nga wala na sa panahon, gidid-an usab sa pagkuha og mga pasaporte. Ang ilang mga lisensiya sa pagmaneho, propesyonal ug mga lisensiya sa trabaho, ug mga permiso sa paglingaw-lingaw ug isports, pugngan, suspindihon, o higpitan sama sa gipahayag sa ilawom sa balaudnon.
Ang walay trabaho nga mga ginikanan nga gikinahanglan nga mobayad sa suporta sa bata, i-plastar kini, aron makaapil sa angay nga mga kalihokan sa trabaho o makapahimulos sa mga programa sa gobyerno aron matuman ang ilang obligasyon.