Nagkumboya na sab sila si Lauri Markkanen ug Fil-Am star Jordan Clarkson aron agakon ang Utah Jazz sa laing kadaugan batok sa hosts Atlanta Hawks, 125-119, kagahapon, Nobiyembre 10, 2022 (PH time) sa National Basketball Association (NBA).
Si Markkanen nirehistro og kaugalingon niyang season-high 32 puntos aron pangulohan ang kadaugan samtang nidugang og 23 puntos si Clarkson.
Naila ang Hawks sa grabe ka hugot nilang modepensa batok sa three-point shooters sa kontra apan ning sangkaa, wala kini mosaler.
Kon nalimitahan sa Hawks ang nangagi nilang mga kontra og average nga 32.5% three-point shooting, ang Jazz nitali og 43.6% ning maong departamento, kadaghanan ilang nahimo pinaagi sa catch-and-shoot.
“That’s kind of our thing,” matod ni Markkanen. “We keep the ball popping and everybody is having fun. Just keep having fun. Keep knocking them down.”
Sa kadaugan, napahugtan sa Jazz ang ilang paggunit sa liderato sa Western Conference dala ang 10-3 nga rekord.
Ang Jazz nakadawat sab og 18 puntos gikan ni Malik Beasley ug 14 puntos gikan ni Kelly Olynyk.
Ang Hawks, nga natagak sa 7-4 nga rekord, gipangulohan ni Dejounte Murray pinaagi sa iyang 26 puntos samtang nihatag og 22 puntos matag usa sila si Trae Young ug DeAndre Hunter.
Sa kinatibuk-ang duwa, ang Jazz ningsalig ug ninglampos sa ilang outside shooting, butang nga wala nabuhat sa Hawks.
“I think we got a lot of looks that we turned down,” batbat ni Murray. “That was something I kept preaching. ... We’ve definitely got to take the ones we create.”
Ang ikalima sa unom ka three-point shot nga napasulod ni Markkanen maoy nakahatag sa Jazz og 108-98 nga labaw sa tungatungang bahin sa 4th quarter.
Human niini, ang labing duol nga nahimo sa Hawks mao ang lima ka puntos nga biya, 121-116, sa hinapos nga bahin.
Nagkanayon si Utah coach Will Hardy nga nakuha nila ang kadaugan tungod sa pagtinabangay sa tanan niyang ginsakupan hilabi na ang iyang reserbang mga magduduwa, nga ningkayod og maayo sa laing mga departamento.
“It allowed us to stay in the game,” asoy ni Hardy. “I’m really proud of the way our guys responded to some adversity on the road.”