Mga duwa karon: Nov. 11, 2022
3:00 pm- Rain or Shine batok Bay Area
5:45 pm- Blackwater batok Meralco
Parehong adunay bag-ong import ang guest team Bay Area Dragons ug Rain or Shine Elasto Painters sa ilang panagsangka sa premirong duwa karong hapon, Nobiyembre 11, 2022, sa Philippine Basketball Association (PBA) Commissioner’s Cup sa Ynares Center sa Antipolo City.
Gikuha’g balik sa Dragons ang orihinal nilang import nga si Myles Powell aron ipuli ni Andrew Nicholson samtang gibira sa Elasto Painters si Ryan Pearson isip hulip ni Steve Taylor.
Si Powell maoy reponsable sa 4-0 nga rekord sa Dragons pagsugod sa komperensya pinaagi sa iyang averages nga 35.75 puntos ug 8.5 rebounds.
Maayo man sab tuod nga nakaduwa si Nicholson ug nag-average kini og 38.5 puntos sulod sa upat ka mga duwa gikan sa iyang pagpuli ni Powell apan nakatilaw og duha ka mga pilde ang Dragons, nga nagpaghagba kanila sa 6-2 nga rekord.
Sa tan-aw sa Dragons, mas magamit nila si Powell kumpara kang Nicholson hinungdan nga nakadesisyon sila nga kuhaon kini og balik.
Sa ilang bahin, nagkanayon si Elasto Painters coach Yeng Guiao nga ang pag-ilis nila og import usa ka dakong sugal sa ilang kampanya.
Ang Elasto Painters naa sa ikapitong dapit dala ang 4-4 nga rekord. “We’re actually taking a big risk,” pasabot ni Guiao nga napatik sa www.pba.ph.
Sa main game, magsangka ang Blackwater Bossing ug Meralco Bolts nga parehong nanginahanglan og kadaugan ning puntoha.
Ang Bossing anaa sa ika-11 nga dapit dala ang 3-6 nga rekord samtang ang Bolts naa sa ika-12 nga luna bitbit ang 2-5 nga baraha.
Ang mopatigbabaw lang nga walo ang makaabante sa sunod round. (ESL)