Kasagaran natong mga inahan mura makuryentihan sayo sa buntag kay mao pa gali pagmata, deritso man dayon og kara-kara sa mga gimbuhaton pag-andam para sa tanan.
Lupig pa sa mga nanay ang kugita nga daghan og kasway kay dunganon man pagtrabaho gikan sa paglung-ag, pagluto og pamahaw, pag-andam sa mga balon, pamalantsa sa mga uniporme, pagligo sa mga gagmay bata ug uban pa.
Subo palandungon apan usahay di na gali kaatiman sa kaugalingon maong magkagidlay intawon kay magdali-dali pa og ilog-sakay og jeepney para manrabaho.
Mao sab ni rason nganong daghan natong mga nanay ang sayong nangatiguwang sa tumang kahago sa inadlaw-adlaw nga tulumanon.
Diay akong ginagmay nga ipa-ambit para di tantong malabihan ka burn out o stress.
Ang trabaho sa balay balikbalik ug way kahumanan busa ayaw pugsa imong kaugalingon pagtapos sa tanang mga tulumanon aron di mahago. Ang uban intawon nga naninuod nangasakit ug nangamatay na hinuon.
Pangita og panahon para sa kaugalingon nga maka relax ug pahuway. Way kumo ang paglingkod o tongtong sa tiil, basa sa paboritong basahon o tan-aw sa gisundang tele-novela o drama sa radio. Ayaw ka kunsensya sa pagpahuway kay imo nang katungod ang pagpangga sa kaugalingon.
Paninguha-a ang pagkatulog og insakto unya hinayhinay og biya ang pag-inum og mga sedatives aron makatulog kay kini maka-addict kon kanunayon. I relax imong utok, ayaw segi og pamalit og problema ug kaguol o huna-huna og lawom. Hinuon pangita og paagi nga malipay, maka-katawa og pahiyom kay ang tanang problema molabay ra.
Ayaw segi og pagdali, kalma lang unya ginhawa og lawom.
Panagsa, lingkod sa gawas unya simhot sa humot nga mga buwak sa imong palibot o hanggap og preskong hangin.
Kon maglain gali ang paminaw sa lawas, ayaw agwantaha o dugay-dugaya, bisita gilayon sa imong doctor kay imong kinabuhi usa ra. Kanunay i-monitor imong sugar level ug blood pressure.
Panagsa, premyuhi imong kaugalingon pagpalit sa imong gustong kan-on o gadgets nga makapasayon sa imong ginbuhataon.