Human sa malampuson nga pag rescue ug pagsalbar sa kinabuhi sa usa ka libud suroy nga iro nga gidunggab ang ulo sa wala pa mailhi nga tawo sa Barangay Bonbon, ang kapulisan sa siyudad sa Sugbo moimbestigar aron pag-ila niini.
Matod ni Police Lieutenant Colonel Wilbert Parilla, deputy city director for administration sa Cebu City Police Office (CCPO), nga nakadawat silag kamandoan sa Konseho sa siyudad sa Sugbo nga mosulod na sa imbestigasyon labot sa insidente.
Gitahasan ni Parilla ang Mabolo Police Station nga mohimo sa imbestigasyon ug ilhon kon kinsa ang midagmal sa iro nga ginganlan sa naka rescue nga si Bonbon.
“The city council represented by Councilor Zafra directed us to conduct an investigation with regards to the incident katong sa iro nga gidunggab ang ulo. We are already directing the chief of police Mabolo Police Station 4 to conduct the investigation,” matod ni Parilla.
Gipasabot ni Parilla nga bisan usa ka libud suroy ang maong iro, apan dunay balaod nga naghatag og proteksyon kanila aron dili sila dagmalan.
Kon mailhan sa imbestigasyon ang responsabli sa pagpasakit niini mag-atubang kini’g kaso nga kalapasan sa Republic Act 8485 kun Animal Welfare Act of 1998.
Ang hepe sa CCPO nga si Police Colonel Ireneo Dalogdog nanawagan na usab siya sa ilang Facebook page ngadto sa publiko nga kon kinsa kadtong nasayod ug nakaila sa nidagmal kang Bonbon, i-report kini sa labing duol nga police station.
Lakip sa iyang awhag nga dili dagmalan ang mga hayop sama sa iro nga giila nga man’s best friend sanglit duna usab kini balatian sama sa tawo nga masakitan kon abusohan.
“Sa atong mga kaigsuonan labi na diha sa Bonbon, kon kinsa kadtong nahibalo or dunay nahibaloan kon kinsa tong tawo nga nagdunggab atong iro, dili lang kini usa ka hayop but duna sab kitay balaod nga nag regulate sa tanang mga hayop. Kini ang Animal Welfare Act nga usa ka criminal nga kaso,” matod ni Parilla.
Una nang nag viral sa social media ang hulagway ni Bonbon nga nagtaop pa ang kutsilyo sa agtang niini diin daghan ang mikondinar ug daghan usab ang mitabang nga maluwas sa tino nga kamatayon.
Sa pagkutlo ning balita, naa na sa luwas nga kahimtang si Bonbon human nakuha ang nag-ungot nga kutsilyo sa agtang ug maayo nang pagkaatiman sa veterinary clinic diin siya nagpahuway.