DABAWENYO, pahimusli ang mga programa ug serbisyo nga hatud sa National Children’s Month. Kini human nga gibuksan sa City Government of Davao ubos sa Special Office for Children’s Concern (SOCC) ang selebrasyon pinaagi sa "Serbisyo Caravan para sa Pamilya at Kabataan" didto sa Rizal Park niadtong Nobyembre 7, 2022.
Ang serbisyo caravan nagtanyag sa nagkalaing serbisyo sa gobyerno alang sa kabataan, sama sa dental services, distribution sa dental kits ug mosquito repellants ug Covid-19 vaccination sa City Health Office (CHO).
Naa sab ang registration services sa City Civil Registrar's Office ug seedling distribution sa mga City Environment and Natural Resources Office (Cenro) ug uban pa.
Ang Children’s Month karong tuiga dunay temang “Kalusugan, Kaisipan at Kapakanan ng Bawat Bata ating Tutukan.”
Ania ang mga events sa selebrasyon sa Children’s Month nga angay pahimuslan sa mga Dabawenyos.
Karong Nobyembre 18, matigayon ang Serbisyo Caravan para sa Pamilya at Kabataan didto sa Buhangin Gym.
Pagka-Nobyembre 24 hangtod 25 mao ang 20th city-wide Children’s Congress didto sa Ritz Hotel.
Sa Nobyembre 25, dunay ipahigayon nga Peso-Davao ug ICT Job Fair sa NCCC Buhangin, samtang sa Nobyembre 29, mahitabo ang Serbisyo Caravan alang sa Pamilya at Kabataan didto sa Crossing Bayabas, Toril, Davao City.
"Dako kaayo ning tabang sama nako nga bag-o lang ni-graduate, makakita unta kog work sa Peso-Davao ug ICT Job Fair," ingon ni Jennifer Lofranco, taga Barangay Indangan, Davao City nga nahinabi sa Superbalita pinaagi sa Messenger kagahapon.