Taliwa sa grabeng pagbugalbugal sa mga drayber sa mga sakyanan sa bike lanes, ang Sugbo Bike Lanes Board naninuod na. Sa nanglabay nga mga semana, ilang gipahugtan ang pagpatuman sa ordinansa nga nagsilot sa mga drayber nga nakababag sa agianan sa biseklita.
Sa kadaghan sa mga drayber nga wa nagtahod aning bike lanes, naay mga adlaw nga di mominos 20 ang ilang maisyuhan og citation tickets.
Unsaon man gud, sa pagkahuman aning paghimo og bike lanes, gipasagdan ang mga sakyanan nga maka park og temporary nga mag blink ang suga.
Alang nako, di ni sakto tungod kay bisan unsaon nimo og tan-aw, pagbabag man gihapon na sa biseklita. Kuyaw pa kaayo nga makamugna og disgrasya tungod kay mogawas na sab sa bike lane ang biker. Kuyaw kaayo mapunggitan og sakyanan taliwa sa kagagmay sa atoang mga karsada.
Naa pa gani uban nga part sa bike lanes nga no stopping ug no parking zone, but grabeha kadaghang mga drayber nga naglapas. Naandan kaayo ni sa part sa mga eskina sa P. del Rosario ug Don Pedro Cui, duol sa among buhatan sa SunStar.
Sa balaud sa trapiko, ang pag park og sakyanan duol sa mga eskina kalapasan na sa nasudnong traffic code. Apan daghan ang wa masayod niini.
GIPLANO UNTA
Di usab ta hingpit nga makabasol sa lokal nga kagamhanan sa Siyudad sa Sugbo tungod kay di man ni ilaha nga proyekto, iyaha ni sa Dept. of Public Works and Highways (DPWH). Naa lay gamay nga counterpart ang Siyudad.
Hayan gidali-dali man gud ni sa DPWH ang pagbutang og bike lanes sa dagkong mga karsada sa siyudad nga posibleng way pagtuon ug pagplano basta kay mabutangan og bike lanes. Mao ni ang akong pagtan-aw kay sa hamubo nga higayon atol sa pandemic, ila ning gihimo.
Ang Cebu City duna na lagi study unta asa nga mga karsada ang angay nga butangan og bike lanes pinaagi sa abag sa umbrella organization sa mga bike enthusiast. Apan wa ni gamita o basehi kay daghan sa mga karsada nga wa namo giapil sa pag-endorse, giapil man.
Ang nauyonan ra nako nga bike lane kanang naa sa South Road Properties (SRP) nga exclusive sa bike. Maayo ni alang sa mga magtuon og biseklita.
IPATUMAN GYUD
Nasugdan na man ni ang pagpanakop sa malapason nga drivers, angay ning ipadayon nga way paglunga. Dalaygon ang gibuhat sa bike patrollers karon nga ila nang gitinuod ang pagpatuman sa ordinansa nga dugay nang gibugalbugalan sa mga drayber sa mga sakyanan.
Hinaut usab nga tinud-on ang paggukod niini nga mga drayber, pinaagi sa pakigtambayayong sa Cebu City Transportation Office (CCTO), pasakaan og kaso sa korte ang di dayon makabayad. Kadtong di gihapon mobayad, ang mga ngan niini iduso ngadto sa Land Transportation Office sa pribadong mga sakyanan (LTO) ug Land Transportation Franchising and Regulatory Board (LTFRB) alang sa pampublikong mga sakyanan.
Kani nga paagi usa sa mga dan nga matuman ang damgo ni Mayor Michael Rama nga “Singapore-like” Cebu City.