Seguraduon sa Cebu City Disaster Risk Reduction and Management Council (CCDRRMC) nga ipatuman ang tanang safety measures atol sa selebrasyon sa Sinulog 2023 aron malikayan ang bisan unsang ‘man-made disaster’ sama sa nahitabong fatal stampede sa Seoul, South Korea.

Si Konsehal Mary Ann Delos Santos nipahumdom sa SangguniangPanlungsod ang naasoy nga trahedya kinahanglang magsilbing pasidaan sa mga opisyal sa dakbayan sa Sugbo nga mangandam og maayo sa tanang public events nga makadani sa mga tawo sama sa concert ug festival.

Ang trahedya sa Halloween sa Itaewon, Seoul niadtong Oktubre 29, mikalas sa kinabuhi sa kapin sa 150 ka mga tawo nga kasagaran anaa sa edad nga 20 anyos.

Si Delos Santos niingon nga walay mas dagkong kalihukan sa dakbayan sa Sugbo kay sa Sinulog Festival nga mahitabo matag ikatulo nga Dominggo sa matag tuig.

“Sinulog organizers must prepare thoroughly and coordinate with each other for the said event, and anticipate a large number of revealers, most of whom could be teenagers who tend to be raucous, especially after the hiatus of two years,” matod ni Delos Santos.

Ang konsehal nipadayag usab sa iyang suporta sa desisyon ni Mayor Michael Rama nga ipahigayon ang kapistahan sa South Road Properties (SRP).

Sa pakighinabi sa SunStar Cebu, Dominggo, Nobiyembre 13, 2022, ang chairman sa CCDRRMC nga si Gerardo Carillo niingon nga anaa pa sila sa proseso sa paghimo og operational plan alang sa Sinulog, ilabi na sa emergency ug contingency plans.

Apan matod ni Carillo, dili na bag-o alang kanila ang maong mga matang sa kalihukan sanglit aduna nay susamang dagkong panagtapok sa SRP.

“Ang security preparation is being taken by the PNP (Philippine National Police). Dili na something new to us kay we have experienced kadtong 250,000 to 300,000 nga crowd ngadto sa SRP. So, holding a crowd of bigger magnitude that is not something new for the disaster office to handle,” matod ni Carillo.

Bisan pa niini, si Carillo niingon nga dili sila mokompyansa ug kinahanglang susihon nila ang tanan sama sa pag-ila sa posibleng choke points nga maoy usa sa hinungdan sa stampede sa South Korea.

Ang igo nga mga access point alang sa emergency responders ang mailhan usab sa CCDRRMC alang sa dinalian ug dili mapugngan nga pagtubag kon adunay mga emerhensya nga medikal, dugang niya.

Tungod kay daghan ang open spaces sa SRP, si Carillo niingon nga mahimo usab nilang butangan og igong water station ang mga tumatan-aw aron maka-rehydrate. (IRT)