“Dapot para kekatamu ating metung mung Dyos,
ing Ibpa, nung kaninu menibat ding sablang bage
at nung para kaninu tamu mimiral.
At ating metung mung Ginu, Yesu Kristo,
a king kapamilatan na ding sablang bage dintang
at kapamilatan na mimiral tamu.”
~ Mumumunang Aklat ding Korinto | Dangka 8: Sunis 6
(1 Corinthians 8:6)
“Ating miyayaliwang paralan
king pamanggawa, dapot ing Dyos mu naman
a gagawang segana-gana karing sablang tau.”
~ Mumumunang Aklat ding Korinto | Dangka 12: Sunis 6
(1 Corinthians 12:6)
“Metung a Dyos at Ibpa ding sabla,
a makapaymbabo karing sabla,
at kapamilatan na, at kekayu ngan.”
~ Ding Episyano | Dangka 4: Sunis 6
(Ephesians 4:6)
“Dapot i Moyses at Aaron migsubsub la, at ngara, O Dyos,
ing Dyos a magkalub inawa karing sablang mabibye,
mimwa Ka kaya karing kerakalan nung ing metung ya mung tau mikasala?”
~ Ding Bilang | Dangka 16: 22
(Numbers 16:22)
“Dapot Ika ing Ibpa mi,
agya mang i Abra’am e na kami balu,
o e na kami kikilalanang Aaron;
Ika, Ginu, ing Ibpa mi,
ing Talapangabus mi king mimunang panaun ing Lagyu Mu.”
~ Isayas | Dangka 63: Sunis 16
(Isaiah 63:16)
“Binang matas king balitang a matas, at upaya, at sikanan,
at sakup, at balang lagyung midinang lagyu, e mu king labwad ayni,
nung e mu naman king daratang pa.”
~ Ding Episyanu | Dangka 1: Sunis 21
(Ephesians 1:21)
“Keka, Ginu, ing kadakilan at ing sikanan,
at ing ligaya, at ing legwan at ing kislap,
uling ing segana-gana king banwa at yatu, Keka.
Keka, Ginu, ing kayaryan;
makayangat Ka anting pamuntuk karing sabla.”
~ Mumunang Akalat ding Tala | Dangka 29: Sunis 11
(1 Chronicles 29:11)
“Ika ing ibpa niting ganap a pansiklubang mayayakit,
ing kasamba-sambang pun, ing pang-diwang panginwan.
Alang makikapara Keka, layun ala mu namang kapara Mu.
Busal ding atlung labwad, e da Ka asukad.
“Ika ing Kakataskatasang Panginwan,
a samban da ngan ding sablang mabibye.
Inya pin sasakab ku arapan Mu
bang ampangan Kang pamigalang
at ipagparalampu ing kekang pakalulu.
Sana e mo papansingan ding kamalyang arapat ku Keka at pibatan
Mu ku anti ning ibpa king anak na, o mengari king kakaluguran
king kakaluguran, o king malsinta king keyang pakamalan.”
~Dalit ning Kakataskatasang Panginwan | Dangka 11: Sunis 43-44
(The Song of God 11:43-44)
***
Keraklan karing pagmulan ding lumpungan o wars ya pin ing kapanwalan dang bulag ding kearaklan a ila mung kaluguran ning Dyos uling ila mu ring anak na uling ita ing turu ning aguman kasalpantayanan a nung nu la kayagum.
Ala lang sukat pipaten ding miyayaliwang kasalpantayan nung ing sangkan da balang metung karela isipan dang ila mu kabud ding anak at pakamalan ning Ginu uling itamu ngan anak na katamu ngan inya pin sa pakamalan na katamu ngan nanu man ing kasalpantayanan tamu o agyang ala ta’mang kasalpantayanan—pati na ding alang Dyos.
Ita ing panibatan ning gulu, pamipate-pate maging maragul a lumpungan at pangmabilug a yatung alingasngas a maging bunga ning maling kapanaligan. Ing pamaglugud king Dyos likas ya king balang metung kekatamu. Kasi alus balang aguman kasalpantayanan a mibansagan panaligan dang ila mung makikilala king Dyos at ila mung tutupad king kaburyan Nang tune inya sa’t ila mung miligtas kanu. Agyang ding tau at ding aliwang kaladwan kaluguran da la ding anak da mananu la man at ipanglwalu da la at e da la paburen deti—mamintu la man karela o ali. Kikilalanan do man o ali. Likas na ita kekatamu.
Nung wari kelingwan tamu mu ing katutwang ita uling nung akalingwan ta’Ya ing Ginu agawa tamu ing magpakasasa king e naman tutung malyaring magkalub ganap a kebsyan at tutwanan at lubus a ligaya ing nanu mang kapagsalwaksabyan.
Alang aguman king pamaglugud king Dyos.
Alang aguman king pamanyuyu king Dyos.
***
Dake Talabaldugan:
1. milwal¹ (pangdiwa) mekalwal na, mekapunta na kilwal, mibulus na menibat kilub. English – got out; able to get out; freed, liberated, emancipated. Alimbawa king pamangamit: “Inya pala ating bandang mosikus keng bungad ning baranggay da—milwal ne pala keng pangasukul na i Leila.”
2. milwal² (pangdiwa) makalwal, makapunta kilwal, mibulus, manibat kilub. English – will get out; will be able to get out; will be freed, will be liberated, will be emancipated. Alimbawa king pamangamit: “Pengaku ning kabulusbulus pa mung sadyang makakulung a nung milwal ya miyadya la kaya deng sablang mikasala kaya uling malambat yang migkasakit.”
***
MIKASING-KABALDUGANG at MISALUNGAT
KABALDUGANG AMANU TAMU
kapisi – malating dake ning mengaspak o misalbag a bage anti ing kuran, pasu, salamin, basu, pinggan o nanu mang bage masaspak.
kaputut – dake ning metung a bage mikawani pauli ning pangaputut, pangapitna, pangapirasu, o pangabalbal.
kapirasu – dake ning metung a bage mikawani pauli ning pangaputut, pangapitna, pangaputut, o pangabalbal.
kalapanti – pira-pirasu ning mebalbal o mengabalbal a pinggan, basu, silyo o nanu mang mangaspak at mababalbal.
kabalbal – kapirasu ning nanu mang mebalbal a bage, lakwas na salamin a kasangkapan a mababalbal o masaspak.
kapurit – malating bage a malyaring talnan libutad ding tindaragul at aliwang taliri.
kapuling – malating-malating bage a mekad alipugpug, kapirasu ning nanu mang bage.
kamugmug/mugmug – mangalating dake ning malutung a tinape ani ring pitabasan, o bage singlati ning alikabuk, balas o banlik.
kasakmal – malating bage a malyaring midatuk king makatikum a palad.
***
Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king garciakragi@yahoo.com/ mag-text o maus para karing kutang o munikala: 0942-3924-399 o 0945-3795-270.